مش أول مرة، لكن دي اللي فتحت النار على الأفعال اللي زيّ دي، اللي تخلي صحيفة بكل سهولة تتخلى عن”أخلاق المهنة” أو حتى أبسط مفهوم للمهنية، علشان نزود تفاعل الناس و”تجيب ريتش” من كومنتات، حتى لو الكومنتات دي هتكون إهانة وشتيمة لشخص بسبب كلام هو حتى ماقالوش، أو قاله في سياق طبيعي وشخص قرر يقص الكلام لوحده علشان يدي معنى تاني.. مانشيتات بتصريحات غريبة على لسان مشاهير، بتقلب الدنيا عليهم وتخلي الجمهور يهاجمهم.. آخرهم الفنانة بسمة.
تصريحات انتشرت في كل مكان على لسان الفنانة بسمة، وبتقول إنها رفضت ترضع بنتها وإنها بترفض تقوم بدور “بقرة” في حياة حد، وإنها كمان بترفض إن البنت تنام جانبها. تصريحات خلت الجمهور يهاجم بسمة ويوصفها بالتجرّد من مشاعر الأمومة، ووصلت لإن البعض قال إنها ماتستاهلش تكون أم!
وبعد كل ده، اتضح إن تصريحات بسمة اتكتبت بطريقة غير السياق اللي اتقالت فيه تمامًا، بسمة كانت ضيفة في برنامج واتسألت عن الحاجات اللي الأمومة غيّرتها فيها، وقالت إنها كانت حاطة rules وماكانتش عايزة ترضع بنتها، وكانت عايزة تعوّدها على نظام نوم معين في مكان لوحدها، لكن بعد ما خلفت كل ده اتغير تمامًا في نظرها ورضعت بنتها سنتين وفضلت سنين تنيمها جانبها.
دي مش أول مرة صحف وصفحات على السوشيال ميديا تستغل أي تصريحات لفنانين ومشاهير علشان تحقق انتشار وهمي على حساب الشخص ده، وتغير من سياق الكلام بطريقة تثير الجدل، بشكل متعمد علشان الكومنتات والشير.
التصريح ده كمان من وقت قريب أثار الجدل وانتشر بشكل كبير، وطبعًا متخيلين معظم الكومنتات كانت بتقول إيه، مع إن لو سمعت الكلام كامل في الحوار اللي اتقال فيه، مش هتحس بحاجة غريبة زيّ وأنت بتقرأ العنوان ده في الصحف، كلام عن فتى الأحلام أو مواصفات الزوج اللي بتتمناه، سؤال متعودين نسمعه في البرامج، وحتى للفنانين وبيتقال لهم إيه مواصفات الزوجة اللي بتحلم بيها، والإجابة المعتادة إنها تحترم ظروف شغله وطبيعته، وكذلك ردود الفنانات إن الزوج يتفهم طبيعة شغلهم. لكن قص جملة من سياق حوار علشان تبقى عنوان يشد الناس إنها تشتم في الفنان، هل هي دي الصحافة! ده طبعًا غير الأخبار اللي بتكون من أولها لآخرها غلط أو ماحصلتش..