#سكوب_أمل: وجبات صحية مجانية لمرضى الكورونا المعزولين في البيت

مع ارتفاع أعداد مصابي الكورونا في مصر، انتشرت على السوشيال ميديا فيديوهات وبوستات مختلفة لمرضى الكورونا بيشتكوا فيها وبيستغيثوا من تنمر بعض الأشخاص المحيطين بيهم ورفض المطاعم والمحلات توصيل احتياجاتهم لبيتهم. الوضع ده دفع “بسمة مصطفى” إنها تبادر وتعلن عن توفير وجبات مُختلفة لمرضى العزل اللي مش قادرين يخدموا نفسهم. وفي خلال ساعات قليلة، المبادرة كبرت وأنضم ليها أعداد كبيرة من المتبرعين إما بتكلفة الأكل، أو طبخ الوجبات، أو توصيلها.

بواسطة: فيسبوك

كل الوجبات اللي بيتم توزيعها بيكون مكتوب عليها رسائل إيجابية. وعلشان تكون جهود المبادرة على أعلى شكل من التنظيم، اتعمل جروب ليها على الفيسبوك بيضم حالياً أكتر من 14 ألف مشترك. ونوعية المساعدات المطلوبة هي إما الإبلاغ عن حالات العزل اللي محتاجة مساعدة علشان يتم حصرها، او المساعدة بوجبات صحية معينة، وده بعد ما سأل القائمين على الجروب أخصائيين تغذية عن احتياجات المرضى في الوقت ده، أو المساعدة في توصيل الوجبات لبيوت الأشخاص المصابة دول أي اختلاط.

بواسطة: فيسبوك

في خلال أيام معدودة، قدرت المبادرة توزع أكتر من 100 وجبة في أماكن متفرقة جوا القاهرة. وعلشان تكون جهودهم مُنظمة أكتر قاموا بعمل استمارات لطلب التطوع وطلب الوجبات، والاستمارات دي بتشرف بسمة عليها بالإضافة للقائمين على الجروب.

آخر كلمة: لو حابين تنضموا لمبادرة “وجبات صحية لمصابي الكورونا المعزولين في البيت” تقدروا تتابعوا الجروب الخاص بيهم من هنا.

تعليقات
Loading...
Tweet
Share
Share
Pin