دينا الشربيني بتحاول تفك نحس 2020

سنة 2020 مش محتاجين نتكلم عنها، كلنا عارفين أثرت فينا إزاي بالوحش قبل الحلو، وكمان في حياة النجوم كانت سنة مختلفة وفارقة، دينا الشربيني بالنسبالها 2020 كانت فيها تقلبات من الحظ والنحس، لكن في 2021، دينا بتحاول تفك النحس اللي حصل كله، وبقت تريند لأكتر من حاجة، من احتفال رأس السنة مع أصحابها لمسلسلها الجديد لأخبار تواجدها في دبي في نفس الوقت مع عمرو دياب، فتعالوا نشوف إيه الحكاية.

انتشر فيديو دينا الشربيني وسلمى أبو ضيف وهما بيشاركوا في تحدي تكسير الأطباق في أحد المطاعم، ودي عادة يونانية عند الأغنياء كانوا بيستخدموها في بعض المناسبات لفك النحس.

بعد انتشار صورتها في ليلة رأس السنة وهي بتحتفل مع أصدقائها في دبي، وفي نفس الوقت انتشرت صور لعمرو دياب في دبي بعد إقامة حفلته في رأس السنة، لكن مع أولاده، ومفيش صور جمعته هو ودينا، لكن برضه الناس فضلت تخمن هما رجعوا لبعض أو فيه محاولات للصلح؟

وبعيدًا عن كل التخمينات دي، دينا في انتعاشة فنية وبتحضر لمسلسها الجديد وناوية تكسر بيه الدنيا في 2021، “قصر النيل” من تأليف محمد سليمان عبد الملك وإخراج خالد مرعي، وانتشرت أخبار عن انتهاء خالد مرعي من اختيار أماكن التصوير الخاصة بالمسلسل وبدأوا في بناء الديكور الرئيسي للمسلسل اللي هتدور أحداثه في إطار الغموض والتشويق.

ده غير فيلم 30 مارس، اللي بينتمي لنوعية السيكو دراما، وبتشارك فيه دينا مع نجوم كتير منهم أحمد الفيشاوي، وخالد الصاوي، وإنجي المقدم، وأسماء أبواليزيد، وندى موسى، وصبري فواز، ومحمد شاهين، ومحمد جمعة، ومحمد علي رزق، وأحمد خالد صالح، وبيضم كمان مجموعة من ضيوف الشرف، الفيلم من إخراج أحمد خالد موسى، وتأليف حميد المدني.

‎ده غير إنها كمان في انتظار عرض فيلمها “‎البعض لا يذهب للمأذون مرتين” بطولة كريم عبد العزيز، وماجد الكدواني، وبيومي فؤاد، ومحمد ثروت، ومجموعة ‏كبيرة من ضيوف الشرف، من تأليف أيمن وتار، وإخراج أحمد الجندي، بنتمنى إن السنة دي تبقى سنة مليانة بالنجاح لدينا على كل المستويات.

آخر كلمة: ماتفوتوش قراءة: ردود أفعال الناس على الكلام اللي انتشر عن انفصال عمرو دياب ودينا الشربيني

تعليقات
Loading...
Tweet
Share
Share
Pin