في شهر ديسمبر من كل سنة، بتستضيف سينما زاوية بانوراما الفيلم الأوروبي، مجموعة أفلام من 20 دولة أوروبية بيتم عرضهم السنة دي، في الدورة الـ 15 من البانوراما في سينما زاوية وسينما الزمالك، على مدار 10 أيام.
بانوراما الفيلم الأوروبي هي فعالية سنوية أطلقتها شركة أفلام مصر العالمية سنة 2004، ومن سنة 2014 بقت سينما زاوية مسؤولة عن تنظيمها، وعلى مدار الأيام الـ 10 من البانوراما بتتعرض أحدث الأفلام الروائية الطويلة والتسجيلية اللي حصدت جوائز من مهرجانات عالمية مرموقة، بالإضافة لأفلام من علامات تاريخ السينما من جميع أنحاء أوروبا.
بتستضيف البانوراما مع عروض الأفلام، مجموعة من البرامج الموازية وورش العمل والمحاضرات اللي بيديرها ويلقيها محترفين في مجال الصناعة حول العالم.
ازاي تحضر أفلام بانوراما الفيلم الأوروبي؟
تقدر تختار الأفلام اللي عايز تشوفها من خلال موقع السينما، وعلى صفحة البانوراما، وتحجز الفيلم سواء عن طريق بطاقة الدفع البنكي، أو من خلال فوري أو طرق الدفع المختلفة الموجود، بعد الدفع هيتبعت لك رقم “كود”، هتاخد الرقم ده وتديه لشباك التذاكر وهيطلع لك التذكرة.
خد بالك إن في كذا عرض للفيلم الواحد، عرض منهم بيبقى في سينما زاوية والعرض التاني في سينما الزمالك، وبكده تقدر تختار الوقت المناسب ليك علشان تشوف الفيلم.
عنوان سينما زاوية: 15 شارع عماد الدين، وسط البلد، وتقدر تمشي على الجي بي أس GPS من هنا.
أما عنوان سينما الزمالك فهو 13 شارع شجرة الدر، الزمالك، وتقدر تمشي على الجي بي أس GPS من هنا.
متوفر مع كل الأفلام ترجمة إنجليزية وترجمة عربية، وسعر التذكرة في سينما زاوية 70 جنية بالإضافة لـ 12 جنيه ضريبة مضافة، أما في سينما الزمالك التذكرة بـ 75 جنية في الصالة، وتذكرة البلكون 150 جنيه بالإضافة للضريبة المضافة.
عروض الأفلام بتبدأ بعد 15 دقيقة من الوقت المحدد في الكاتالوج، وبعد 30 دقيقة من نفس الوقت بتتقفل أبواب صالات العرض وبيتمنع الدخول.
أقسام البانوراما لسنة 2023
أول قسم في بانوراما الفيلم الأوروبي لسنة 2023 بعنوان (شقوق حميمة)، وبيركز علاقات القرابة، وازاي ممكن تأثر على مصيرنا كأفراد، وفي الفيلم مجموعة من الأفلام هي: رحيق عطلة صيف، وقريبان، ولورا، وأكتر من أي وقت مضى، وأم وابن، وصباح يوم جميل، والابن.
أما المجموعة التانية (تقمّص) فـبتدي مساحة أكبر للتأمل الأدائي، وبتطرح سؤال إيه اللي تقدر الشخصية تعمله بعيدًا عن الممثل، وفي المجموعة دي خمس أفلام: رقيقة، ريميني، المهمة، والعاديون، ومثلث الحزن.
بتركز المجموعة التالتة (أن ترى) على مفهوم الصراع الوجودي، وإظهار تمثيلاته، والأفلام الموجودة في المجموعة هي: مشد الخصر، ومارسيل، وبندول الإيقاع، وروديو، والحديث عن الطقس، والفتاة الهادئة، وفيرا.
وبتطرح البانوراما أفكار الهجرة والاغتراب من خلال مجموعة (مناطق وعرة) اللي بتناقش أفلامها معاني الانتماء، والعلاقة بالمكان، وأفلامها: نوبة حراسة، وجزيرة الصخرة، وأرض الرب، وزهور بشرية من اللحم، وعذاب فوق الجزر.
أما مجموعة الأفلام اللي بتتعرض تحت عنوان (في السر) تتناول أحداث غير عادية، واللي أحداثها غامضة وبتتكشف ببطء وهدوء، ومن أفلام المجموعة دي: كائنات جميلة، والمياه، وإيو، وسرفيام سأقوم بالخدمة، وليلة يوم الثاني عشر.
أمّا القسم الأخير (المستضعفون) فيعرض حياة شخصيات هامشية ومنبوذة، وبتناقش فكرة إن النظم المجتمعية بتبني نجاحها على أساس خلق أدوار معيارية للناس اللي بتعيش فيها، والأفلام دي هي: الجميع يكره يوهان، والغميضة، وقصة الحطاب، وأسوأ أشخاص على الإطلاق، وذئب.
والجدير بالذكر إن الدورة الحالية من البانوراما بتحتفي بالمخرج الفرنسي الراحل مؤخرًا، جان لوك غودار، من خلال عرض أفلام استعادية اشتغل عليها بعد سنة 1968.
تجربة مشاهدة أفلام البانوراما
الصالات بتبقى مليانة على آخرها والتذاكر بتتباع بسرعة جدًا، وعلشان كده محتاج تحجز للأفلام بدري، الجميل في الموضوع إن كل المشاهدين بيكونوا هاديين ومنسجمين مع الفيلم، وبعد الفيلم بيتجمعوا قدام السينما وبتلاقي الناس واقفين بيتناقشوا في الفيلم وبيقولوا آراءهم.
معظم الحضور بيكونوا ناس مهتمين جدًا بالسينما والصناعة وعندهم أفكار نقدية مثيرة، ولو كنت مهتم بالسينما هتلاقي مساحة كويسة جدًا إنك تتعرف على ناس زيك يناقشوك في الأفلام ويضيفوا لرؤيتك الخاصة، ويسمحوا لك تعبر عنها.