دعم استثنائي خلال جائحة الكورونا: 500 جنيه لمرشدي السياحة المصريين لمدة 4 أشهر

اتأثرت مجالات عمل كتيرة بالسلب بسبب فيروس الكورونا، وخسر ناس كتيرة وظائفهم. ومن أكتر المجالات اللي اتأثرت بالوباء الجديد، مجال السياحة اللي توقف تمامًا لأكتر من شهر بسبب تعطيل حركة الطيران، والإجرائات الاحترازية اللي أجبرت بلاد كتير أنها تقفل حدودها بشكل كامل.

ولأن الأزمة دي اتسببت في مشاكل مالية كبيرة لأغلب مرشدي السياحة في مصر، قررت وزارة التضامن الاجتماعي بالتنسيق مع وزارة السياحة والآثار إنها تصرف دعم استثنائي لأكثر من 12،000 مرشد سياحي لمدة 4 أشهر في محاولة منهم لمواجهة تداعيات الكورونا حتى مع عودة السياحة بشكل تدريجي.

ووضحت وزيرة التضامن الاجتماعى نيفين القباج أن الدعم هيبقي لكل المرشدين السياحيين المسجلين على قواعد بيانات وزارة السياحة والآثار، وصرف الدعم هيبدأ من يوم الثلاثاء القادم الموافق 8 سبتمبر. والقرار ده جيه في ظل اقتراب مواعيد الدراسة المدرسية والجامعية اللي هتتطلب مصاريف كتيرة، فحرصت الدولة علي توفير الحماية والدعم اللازمين للمواطنين خصوصًا في الأوقات الصعبة، زي ما وضحت القباج.

الصرف هيبقى علي دفعتين وهيتم من خلال شبكة مكاتب البريد، بالتنسيق مع وزارة الاتصالات وتكنولوجيا المعلومات، ده بالإضافة لهيئة البريد اللي هتساعد في منع التكدس، والحفاظ علي المسافات الآمنة، والالتزام بالإجرائات الاحترازية ضد الكورونا. وكمان هيتم إتاحة خدمة الاستعلام عن أسماء المستفيدين من الدعم بالرقم القومي من خلال الموقع الإلكتروني للوزارة.

آخر كلمة: مع بعض هنقدر نتخطي أي أزمة!

تعليقات
Loading...
Tweet
Share
Share
Pin