خيري بشارة وساندرا نشأت بيتكلموا عن الحب والحياة على نتفليكس

المخرجان المصريان المعروفان خيري بشارة وساندرا نشأت انضموا لمجموعة من المخرجين الموهوبين من أنحاء الوطن العربي لإنتاج سلسلة من الأفلام العربية القصيرة تحت عنوان “عن الحب والحياة”، واللي نزلت على نتفليكس يوم الخميس 10 مارس.

عن: ahram

المسلسل بيتكون من مجموعة مقتطفات سينمائية، وبيستكشف الكوميديا السودا اللي ممكن نلاقيها في الحب من خلال 8 أفلام قصيرة لها تيمة واحدة وهي الحب والحياة.

كل فيلم قصير “حلقة” تم إخراجه من خلال مخرج أو مخرجة مختلفين من سبع دول عربية واللي منهم خيري بشارة وساندرا نشأت من مصر، هاني أبو أسعد وأميرة دياب من فلسطين، ومايكل كمون من لبنان، ومحمود صباغ وعبدالمحسن الذياب من السعودية، وكوثر بن هنية من تونس، وهشام العسري من المغرب.

عن: ahram

كل مخرج بيحكي حكاية بتحصل في يوم عيد الحب (Valentine’s day) وبيخرجها من واقع ثقافة بلده، وكل حكاية هيكون فيها منعطفات وتويستات غير متوقعة بيستكشف المخرج من خلالها الحب كمفهوم كبير والعلاقات من زاوية حميمية وقريبة.

السلسلة من إنتاج اتحاد صناع الفيديو والسينمائيين بالتعاون مع أنطون خليفة كمنتج للمشروع، وتم كتابة سلسلة عن الحب والحياة واتحولت لنصوص سينمائية من خلال الكاتبة المصرية عزة شلبي.

يوم الحداد الوطني في المكسيك: خيري بشارة

عن: ahram

الحلقة اللي هيخرجها خيري بشارة اسمها “يوم الحداد الوطني في المكسيك” ومن تأليف نورا الشيخ، من بطولة آسر ياسين، وندى الشاذلي، ونورا شعيشع. قال خيري بشارة إنه انبسط جدًا بالشغل على الحلقة بتاعته وأضاف: “بنشتغل على أفلام تتجاوز الزمان والمكان ومش مرتبطة بواقع صلب”.

شخصيات السلسلة بتتحرك في واقع مظلم Dystopian space لمجتمع مظلم ومخيف، واللي فيه عيد الحب مُحرم، واللي بيحتفلوا بيه عُرضة للعقاب لدرجة إن اللون الأحمر يُعتبر تابو taboo، والكتب والأغاني أو الأفلام اللي بتعبر عن الحب ممنوعة. وصرح بشارة إنه حس إنه بيقدم نوع من الاحترام والتكريم لفيلم فهرنهايت 451، اللي
أخرجه فرانسوا تروفو سنة 1966 عن رواية بنفس الاسم للكاتب الأمريكي راي برادبري، وقال بشارة إنه بيُعيد إحياء الرواية والفيلم بمنظور مختلف وجديد.

عن: ahram

وبشارة هو مخرج معروف في صناعة السينما المصرية، ومعروف بأفلامه التسعيناتي اللي أسست نوع مختلف من السينما هو الواقعية الجديدة، من خلال أفلام مهمة زيّ الطوق والأسورة 1986، ويوم مر ويوم حلو 1988، وفيلم أيس كريم في جليم 1992، وأمريكا شيكا بيكا 1993، وإشارة مرور 1995، وكابوريا 1990، ورغبة متوحشة 1991، وحرب الفراولة 1993، وقشر البندق 1995.

عن: ahram

وبشارة، اللي هيتكرم في الدورة الـ 23 من مهرجان الإسماعيلية السينمائي الشهر ده، أخرج مسلسلات تلفزيونية مهمة زيّ قلب حبيبة 2005 واللي كان أخر أعمال سهير البابلي، والطوفان 2017، وبنت اسمها ذات 2013.

أخويا: ساندرا نشأت

عن: ahram

ساندرا نشأت بتُخرج حكاية عن شخصية مصابة بمتلازمة داون واللي بتكون سبب في رجوع أتنين عُشاق لبعض. القصة بتركز على الشمولية، والتنوع، والقبول في قصة عن الحب من خلال سردية مختلفة وغير متوقعة، على حسب كلام نتفليكس.

عن: ahram

كاتب الحلقة هو رفيق ماركوس، وهتستضيف نجوم كُبار زيّ أحمد عز وبسنت شوقي، وصلاح عبدالله، وأدهم حسام، واللي بتبدأ لما عمدة قرية يلغي خطوبة بنته لما تميمة الحظ بتاعته تضيع ويعتبر ده حاجة شؤم.

وقال نشأت عن الحلقة اللي أخرجتها: “الحب هو الحياة في مجملها، مش أزمة بنعيش بيها طول العمر ولا حاجة نقدر نفصلها عن الحياة”.

متحمسين جدًا للسلسلة وهنشوفها أول ما تنزل بكرا، وهنوافيكم برأينا فيها من خلال مقال نقدي للحلقات كلها.

آخر كلمة: ماتفوتوش قراءة: بمناسبة يوم المرأة العالمي: 5 مخرجات مصريات أثبتوا نفسهم في صناعة الدراما

تعليقات
Loading...
Tweet
Share
Share
Pin