خمس وصفات شوربة غير تقليدية هتخلي فطارك صحي في رمضان

0

كلنا متعودين على كسر صيامنا بطبق شوربة دافي في رمضان، بس هل تعرفوا إذا كانت دي عادة صحية أو لا؟ خبراء التغذية دايماً بينصحوا بأكل الشوربة قبل البدء في الوجبة الرئيسية، وخصوصاً في رمضان لأسباب صحية كتيرة. طبق الشوربة الدافية بيعوض الجسم عن السوائل اللي بيفقدها طول فترة الصيام، وكمان الشوربة مصدر غني بالفيتامينات والمعادن والعناصر الغذائية اللي بيحتاجها الجسم علشان يقدر يستحمل الصيام لساعات طويلة. وعلشان كده احنا جبنالكم وصفات شوربة لذيذة وصحية تقدروا تجربوها على الفطار.

شوربة الجزر والشوفان

بواسطة pexels.com

الشوفان مليان بالعناصر الغذائية الأساسية اللي بيحتاجها الجسم، وهو كمان غني بالألياف القابلة للذوبان اللي بتساعد على فقدان الوزن بسهولة. وبالنسبة للجزر فهو مفيد جداً ومليان بالفيتامينات والمعادن والبيتا كاروتين. ومن فوايده الصحية، التقليل من خطر الإصابة بمرض السرطان والمحافظة على العين والكبد.

مكونات الشوربة: كوب جزر مبشور، شوفان، بصلة صغيرة، ثوم، مرق دجاج قليلة الدسم، ملح وفلفل اسود، جوزة الطيب.

طريقة التحضير: في حلة متوسطة الحجم، سخن زيت على حرارة متوسطة، وحط البصل والملح واستنى من 5 لـ8 دقائق لحد ما البصل يذبل، وافتكر إنك تقلب طول الفترة دي علشان تتجنب إحمرار البصل. وبعد كده حط الجزر وغطي الحلة لمدة ست دقائق على حرارة منخفضة. وبعد ما يذبل الجزر حط الشوفان والمرقة، وأغلي الشوربة على درجة حرارة عالية.

ولما كل حاجة تستوي، حط الشوربة في الخلاط واخلطها لحد ما تبقى بملمس كريمي، وممكن تضيف عصير الليمون وقت الأكل، واستمتع بمذاق الشوربة.

شوربة البروكلي بالنعناع

بواسطة: ezzouhour.com

البروكلي مليان بمئات العناصر الغذائية اللي تقدر تفيد أجسامنا وتحسن من صحتنا، فمثلاً من ضمن فوايده الغذائية الكتيرة، البروكلي بيحمينا من التهاب المفاصل، وبيحافظ على معدلات ضغط الدم وصحة الكلى، وبيقلل من نسبة الكولسترول في الدم. والبروكلي كمان بيحارب عوامل الشيخوخة وبيحسن من جهاز المناعة عند البشر.

والنعناع في الوصفة دي بيعالج مشاكل صحية كبيرة، فبفضل الزيوت اللي فيه بيعالج مشاكل الجهاز الهضمي، واضطرابات الجهاز التنفسي، وبيخفف ألام كتيرة زي الصداع، وبيحسن الذاكرة، ونقدر نستخدمه كمان كمضاد للآكتآب.

مكونات الشوربة: 5 وحدات بروكلي، عودين نعناع، بصلة، توم، كباية ونص ماية، نص كباية لبن، معلقة كمون صغيرة، ومكعب مرقة دجاج.

طريقة التحضير: قطع البصل والثوم وضيفهم على زيت في كسارولة كبيرة، وفي درجة حرارة متوسطة سيبهم لحد ما يذبلوا. بعد كده ضيف البروكلي واللبن ومرقة الدجاج، وبعد ما يغلي المزيج ضيف النعناع واستنى لحد ما يذبل. وبكده تكون شوربة البروكلي جاهزة

شوربة البنجر

بواسطة: طريقة.كوم

البنجر أو الشمندر ليه فوائد كتيرة لصحتنا، وهو مشهور عالمياً بمحاربته للسرطان وإزالة السموم من الجسم. وكمان بيحسن الشعر والبشرة، وبيقلل من خطورة الإصابة بمرض الزهايمر.

مكونات الشوربة: معلقتين صغيرتين من زيت الزتون، نص بصلة مفرومة، 3 فصوص ثوم مهروسة، 3 كبايات من البنجر المفروم المقشر، أوراق الزعتر، ونص كباية زبادي.

طريقة التحضير: في كسارولة متوسطة الحجم، سخن زيت الزيتون على حرارة متوسطة، وضيف البصل والثوم والملح واستنى لحد ما يذبلوا. ضيف البنجر و4 كوبايات مياه وغطيها لحد ما يذبل البنجر ويبقى ملمسه ناعم. وسيبه يبرد، وبعدين حط المزيج في الخلاط واخلطه لحد ما يبقى كريمي وبعدين حط الزعتر وهو بقى جاهز كده للأكل.

شوربة الفلفل الأحمر المشوي

بواسطة: alarab.com

الفلفل الأحمر مليان بمضادات الأكسدة، فهو غني فيتامين سي بكمايت أكبر من أي نوع خضار أو فاكهة تانية. هو كمان غني بالليكوبين اللي بيقي من امراض كتيرة ومنها السرطان. والفلفل الأحمر بردو مضاد للشيخوخة، وبيمنع تجلط الدم، وبيحمي من النزيف الحاد، وهو مهم جداً للجهاز الهضمي وجهاز المناعة.

مكونات الشوربة: معلقتين صغيرتين من زيت الزتون، 2 بطاطس كبيرة متقطعة، نص بصلة حمراء مبشورة، 4 حبات طماطم مُجففة، مرقة دجاج، ملح وفلفل، ربع كزبرة طازة متقطعة، و تلتين كباية من الكريمة الحامضة، وخمس فلفلات لونها أحمر.

طريقة التحضير: سخن زيت الزيتون في كسارولة كبيرة على درجة حرارة متوسطة، ضيف البطاطس والبصل، والكزبرة، والفلفل. استنى لحد ما يبدأوا يدبلوا، وبعدين ضيف مياه والمرقة والطماطم المُجففة. ولما تطبخ كل الخضروات، ضيف الكريمة الحامضة وأخلط كل المكونات في الخلاط. وأخيراً ضيف عليها الملح والفلفل وهي دلوقتي جاهزة للأكل.

شوربة السبانخ

بواسطة: ستات.com

السبانخ مُصنفة عالمياً كواحدة من أفيد الخضروات لجسم الإنسان، فهي غنية بالفيتامينات، والعناصر المُغذية والمعادن زي الحديد والمغنسيوم. ومش بس كده السبانخ فيها سعرات حرارية قليلة وده بيخليها الوجبة المناسبة للي حابين يخسوا. وهي بردو بتحسن النظر وبتعالج المشاكل العصبية وبتتحكم في ضغط الدم.

مكونات الشوربة: 235 جرام سبانخ، فصوص ثوم، بصل أخصر، زبدة، ملح وفلفل، عودين كرفس، طمطماية مقشرة ومتقطعة مكعبات، بطاطساية صغيرة.

طريقة التحضير: سيح الزبدة في كسارولة كبيرة على حرارة متوسطة، ضيف البصل الأخضر والكرفس، والبطاطسية وقلبهم في الكسارولة شوية، وبعد كده سيبهم لمدة 10 دقائق. حط المرقة والطماطم وسيبهم يتطبخوا سوا لمدة 15 دقيقة، وبعد كده حط السبانخ وسيبها كام دقيقة لحد ما تذبل خالص. وبعدين استخدم مضرب الخلاط اليدوي علشان تمزج الخليط وكده الشوربة بقت جاهزة.

آخر كلمة: لوصفات صحية أكتر شوفوا: نفسك في أكلة جديدة وتكون صحيّة عالسحور؟ متقلقش الوصفات دي هتغيرلك حياتك!

تعليقات
Loading...