كلنا سمعنا عن حادثة الفيرمونت، وللي مايعرفش، الموضوع بدأ وانتشر على الإنستجرام باسم “حادثة الفيرمونت” وأِتُهِِم فيها مجموعة من الشباب باغتصاب بنت بالتناوب عليها بعد تخديرها في فندق فيرمونت نايل سيتي سنة ٢٠١٤.
وبعد ما الموضوع قلب مواقع التواصل الاجتماعى، الموضوع أخيرًا إتحول للنيابة المصرية وبيتم التحقيق فى الواقعة حاليًا.
ومن يومين، نشرت صافحة Assault Police، وهي من أهم صفحات مكافحة التحرش والاغتصاب على الإنستجرام، و قالت إن الشباب المتهمين فى الحادثة بيهددوا الضحية بالتشهير باسمها وصورتها وتشويه سمعتها لو ماتراجعتش. وكان الهدف من الخبر توعية الناس على عدم نشر أي صورة أو اسم يشوفوه وتجاهل أى خبر من النوع ده.
وبعدها، نشرت صافحة تانية Gang Rapists of Cairo حملة لتغطية الانترنت باسامى مختلفة لحماية ضحية الفيرمونت و قالوا “حاولوا تلاقوها فى بحر من الضحايا لو قدرتوا”.
ومن ساعتها، الإنستجرام اتملا بأسامى عديدة من البنات والولاد بيدعوا إنهم ضحية الفيرمونت تحت هاشتاج #IAmTheFairmontVictim (أنا ضحية الفيرمونت).
و جدير بالذكر إن من أكبر الأسباب اللى ساعدت فى انتشار حادثة الفيرمونت وتجميع العديد من الاتهامات والادلة قبل وصولها للنيابة هي صفحة @assaultpolice. الصفحة دى هدفها توصيل الضحايا بالجهات المختصة عشان ياخدوا الإجراءات الصحيحة لتحقيق العدالة، وحمايتهم بمساعدة المجلس القومى للمرأة. اللى ماسكين الصفحة هما برضه السبب فى انتشار قضية أحمد بسام ودخوله السجن.
بعد ما الصفحة ابتدت تنشر اتهامات وأدلة ضد شباب حادثة الفيرمونت، جالهم تهديدات بالقتل وده كان سبب فى تراجعهم عن القضية وقفلهم للصفحة. لكن من ٣ أيام، الصفحة رجعت تانى وقالت إنهم مش خايفين، لكنهم سابوا القضية للنيابة العامة عشان دى قضية حساسة وخطيرة جدًا.
السوشيال ميديا بقت حرفيًا أقوى سلاح الواحد يجيب بيه حقه. حتى لو حصل تهديد أو إبتزاز. الحق هيبان وهينتصر فى النهاية.