في عصر بقى المنتج سهل الوصول ليه وعلى المشاع، بالذات مع انتشار الإنترنت واستخدامه كساحة لعرض الإبداع ده، ظهرت بقوة قضية حماية الملكية الفكرية من التعدي، وظهر الجدل حوالين الاقتباس، وشوفنا كذا مرة في السنين الأخيرة خناقات في بوستات ومقالات بسبب سرقة أو اقتباس محتوى لشخص من شخص تاني، وهجوم وهجوم مضاد، وكل واحد بيعرّف حقوق الملكية الفكرية على طريقته.
كان من المعروف إن فكرة الاقتباس هو أمر بيحصل في السينما والفن والأدب، بس دلوقتي بقينا بنشوف ده في أمور تانية وبأساليب مختلفة، منها التأثر بعمل فني لفنان تاني وهكذا، النوع ده ممكن نقول عليه إن فيه شبهة سرقة، السارق بيحط بس رتوش وإضافات شكلية في محاولة منه لإخفاء سرقته، وهنا بيتحول لنسخة من غيره، بدل ما يكون مُبدع أصيل، لإن الجوهر بيفضل في العمل الفني وحق للفنان صاحب العمل الأصلي.
إيه هو مفهوم حقوق الملكية الفكرية؟
حقوق الملكية الفكرية هي مجموعة من الحقوق الخاصة بتهدف لحماية أعمال المؤلفين والمُبدعين من إعادة إنتاج أعمالهم واستغلالها من غير موافقة منهم، بتغطي حقوق الملكية الفكرية مجموعة واسعة من الأعمال الإبداعية، زيّ المقالات والكتب والمؤلفات الأدبية والصور واللوحات الفنية والمنحوتات والأفلام والمواد الصوتية والبرمجيات والتصاميم المعمارية وتصاميم المنتجات.
عصر إيجي بيست وحقوق الفقراء في المعرفة
مع تضخم الشركات المنتجة للفن والإبداع ومحاولاتها لبيع منتجاتها الحصرية على الإنترنت للجمهور حوالين العالم، وهو الشيء اللي بيرجع عليهم بالمليارات، ظهر اتجاه بيقاوم ده بقوة، وكان أشهرهم مجموعة هاكرز أذكياء جدًا من السويد أسسوا موقع The Pirate Bay الشهير اللي قلب الدنيا حرفيًا، وسرق كل الإنتاج الفني السينمائي من هوليود وغيرها، ده غير الكتب والصور والأغاني.
الموضوع أتحول لقضية كبيرة ورفعت عليهم شركات قضايا ولاحقوهم للقبض عليهم لإنهم خسروهم مليارات الدولارات، في 2013، تم إنتاج فيلم وثائقي بعنوان “The Pirate Bay Away from Keyboard” تضمن مقابلات مع القائمين على الموقع وضحوا فيه إن المعرفة حق للجميع ومش من حق حد يحتكر أي إبداع فكري للتربح منه.
نفس الكلام ممكن ينطبق علي إيجي بيست اللي كل فترة بيثير حواليه جدل؛ هل ده سرقة لمحتوى ومجهود ناس ولا انتزاع حق للجميع في المعروفة والفرجة؟
الفرق بين السرقة والحق في المعرفة
الموضوع فلسفي شوية، في مبدأ رئيسي بيقول إن المعرفة الفنية حق من حقوق الإنسان، يعني محدش من حقه يمنعه، وده بيتصادم أحيانًا مع مُبدعين مش بيعارضوا ده فعليًا بس المنظومة بتجبرهم يدافعوا عنه علشان تعبهم ميروحش على الأرض، غير إنه مصدر دخل ليهم.
أما السرقة الصريحة هي اللي أشرنا فيها في أول المقال، فهي سرقة الأفكار ونسبها لنفسك، أسرق أفكار لوحة أو أسرق مقال أو بحث وأنسبه لنفسي وهكذا. وقصة الملكية الفكرية اللي أنفجرت مع انفجار الإنترنت في العالم مش هتنتهي في يوم وليلة، ولسه قدامنا كتير علشان نوصل لصيغة ترضي الجميع، وقد تعتمد الصيغة دي على إرساء العدالة الاجتماعية والاقتصادية في الأساس.