لوحة معدنية مرورية مميزة في مصر أثارت جدل واسع بعد ما وصل سعرها للبيع في المزاد العلني الإليكتروني على بوابة مصر الإلكترونية لـ50 مليون جنيه في سابقة هي الأولى من نوعها في طرح اللوحات المميزة.
اللوحة بتحمل رقم “م ي ر 555” وشخصين بس اللي كانوا بيزايدوا عليها، وبتعتبر اللوحة دي هي أغلى لوحة على موقع “لوحتك” التابع لوزارة الداخلية المصرية واللي دايمًا بيطرح لوحات سيارات للبيع في المزاد العلني مع وجود إمكانية إنك تصمم لوحتك بنفسك.
بناءً على كلام من مصدر أمني قال إن اللي بيتم دفعه للوحات دي بيروح لدعم “صندوق تحيا مصر” في المقام الأول وقال إن الحروف والأرقام المميزة كإنها تذكار وده مش معناه إن المقابل المادي الكبير ده بيتدفع علشان الحروف والأرقام .
وكانت أعلنت وزارة الداخلية قبل كده عن تجاوز إجمالي مبيعات اللوحات من بداية الخدمة في المزاد الإلكتروني في 2017 لحد دلوقتي لـ300 مليون جنيه،وريعها لدعم صندوق تحيا مصر.
برغم إن في 9 لوحات معدنية، تم طرحهم مع اللوحة دي ولكن مافيش ولا وحدة منهم وصلت للرقم ده وكانت أعلى واحدة فيهم ماوصلتش لـ2 مليون جنيه، والسعر اللي وصلت له اللوحة دي كان سبق في اللوحات المعدنية، لدرجة إن الناس استغربت عن السبب ورا الارتفاع المبالغ فيه اللي وصل له المزاد للوحة دي بالذات دونًا عن غيرها.وبالنسبة للمزاد فالمفترض إنه بتقفل النهارده وفي انتظار إعلان الفائز باللوحة.