حاجات ماتعرفهاش عن فيلم “Home Alone”

مع أوقات الأعياد والكريسماس ورأس السنة، الأوقات اللي بتكون برد ومتجمعين مع أسرتنا وأصحابنا، وبنفضل ناكل ومتكلفتين تحت البطانية، بتكون القعدة ناقصها حاجة واحدة وهي الفرج على التليفزيون، وفي الوقت ده بالذات في فيلم معين علق معانا من طفولتنا ومع كل الأجيال من ساعة ما تم عرضه، وهو فيلم “وحدي في المنزل” “Home Alone”، الفيلم ليه 4 أجزاء ولكن أكتر جزء معلق معانا هو الأول.

“Home Alone” اللي لازم نتفرج عليه كل آخر سنة، وبيتعرض على كل القنوات الأرضية والفضائية، واللي عمرنا مازهقنا ولا هنزهق منه، مهما كان المرات اللي اتفرجنا عليه، لإنه فيلم تقريبًا كامل من الكوميديا للدراما للتشويق، والشخصية الرئيسية “كيفين” اللي كلنا تقريبًا حاسين بيه لغاية دلوقتي كل يوم من حياتنا، وبكل حاجة هو قالها في الفيلم، وكنا على طول وإحنا صغيرين بنتمنى إننا كمان نفضل قاعدين لوحدينا في بيت كبير زيّ ده ناكل ونلعب ونصرف فلوس مش فلوسنا على تفاهات، ولا المطاردة والمقالب اللي بتحصل في آخر الفيلم اللي تخليك قاعد متنح ومسحول مع الفيلم وانت مبتسم.. وعلشان نفتكر الذكريات الجميلة دي، هنقولكم على حقائق من الفيلم ممكن تكونوا مش عارفينها.

العنكبوت كان حقيقي

هجوم الحيوانات في الأفلام على طول بيكون متفبرك، ولكن في المشهد ده العنكبوت كان حقيقي.

الفيلم اتكتب في أقل من 10 أيام

عن: time

كاتب الفيلم جون هيو كتب الفيلم في أقل من 10 أيام بس، وده وقت قليل جدًا لكتابة فيلم.

البيت بيساوي مليون ونص دولار أمريكي

البيت اللي كان ومازال بيت أحلامنا كلنا بيساوي مليون ونص دولار أمريكي دلوقتي، فكملوا أحلام.

النجاح المستمر

عن: time

الفيلم فضل مسيطر على شباك التذاكر لمدة سنة من وقت عرضه في 1990، وحقق رقم قياسي في الإيرادات لغاية سنة 2017.

الفنان جو بيسكي والعضة

الفنان الكبير جو بيسكي عض صباع كيفين بجد.

روبيرت دي نيرو

كان من المفروض إن الفنان العظيم روبيرت دي نيرو هو اللي يقوم بدور الحرامي اللي قام بيه الفنان جو بيسكي.

صاحبة أخوه باظ

في المشهد لما كيفين بيمسك برواز صاحبة أخوه الكبير “باظ” ويتريق على شكلها، هي في الحقيقة ولد ومش بنت.

الفيلم مش حقيقي

في الفيلم الأكشن اللي كيفين بيتفرج عليه وبيكون في المشهد راجل بيزعق وماسك بندقية، ده مشهد اتعمل مخصوص للفيلم، ولكنه مش فيلم حقيقي.

آخر كلمة: ماتفوتوش قراءة: بعد إعلان فيلم توم وجيري الجديد.. تعالوا نسترجع مع بعض ذكريات من الطفولة

تعليقات
Loading...
Tweet
Share
Share
Pin