ثنائي القوة: في عيد ميلاد منى زكي وأحمد حلمي، تعالوا نفتكر أحلى لحظاتهم مع بعض

يوم 18 نوفمبر يوم مميز بكل المقاييس، فاليوم ده بيجمع بين ميلاد الثنائي المفضل للجمهور، منى زكي وأحمد حلمي! كتبنا عنهم في العنوان إنهم ثنائي القوة، لإنهم فعلًا قدوة للجمهور، وقدروا يحافظوا على المودة والرحمة في مواقف ممكن ماتكونش كبيرة زيّ ما بنشوف في الأفلام، ولكنها بتكون أحلى، لإنها حقيقية بعيدة عن أى تزييف.. وزيّ ما منى وأحمد بيجمعهم حب السينما، واهتمامهم إنهم ينشروا الوعي عن قضايا مختلفة تهم المجتمع، كمان بيجمعهم نفس يوم عيد الميلاد.. وعلشان نحتفل بيهم في اليوم ده، تعالوا نفتكر قصتهم من الأول خالص..

بداية القصة

في أول تعارف بين حلمي ومنى، كانت العلاقة مجرد صداقة. ولكن بعد فترة بدأ يحس حلمي بمشاعر حب تجاهها، وقرر إنه يعترف لها قبل ما تروح تصور فيلم “أفريكانو”، وقالها بأحلى طريقة ممكنة كمان، على مركب! وطبعًا في الأول اتكسفت وسابته وراحت الناحية التانية، بس كده كده كلنا عارفين ده بيبقى معناه إيه، مش كده؟ وجيه ردها اللي كان مستنيه من جنوب أفريقيا، واتخطبوا فعلًا بعد لما خلصت تصوير الفيلم ورجعت مصر.

الخطوبة والجواز

الموضوع أخد سنة من حلمي علشان يجهز نفسه ماديًا للجواز، واستغل نجاحه وقتها في فيلم 55 إسعاف، علشان يظهر في إعلان ويأخد في المقابل أجر كبير، علشان يبقى المبلغ ده مهر منى زكي.. واتخطبوا وبعدها، عملوا الفرح اللي حضره كتير من نجوم الوسط الفني، ورغم من إن منى بتقول إنها “بتكره شكلها” في يوم الفرح وقطعت كل الصور، بس إحنا شايفين عكس ده، فالصور مليانة بهجة.. بس مراعاة لمشاعرها، حطينا صورة الخطوبة بس.

أعمال فنية جمعتهم

برغم قصة الحب والزواج اللي بدأت من سنين طويلة، لكن الأعمال الفنية اللي شاركوا فيها مع بعض قليلة جدًا، وكمان ماكنوش بيطلعوا فيها بتجمعهم علاقة مباشرة أو قصة حب مثلًا، ولكن ده مبيقللش على الإطلاق حبنا لفكرة إن عمل واحد يجمعهم. ودول التلات أفلام اللي شوفنا فيهم حلمي ومنى مع بعض.

فيلم ليه خلتني أحبك

فيلم سهر الليالي

فيلم عمر 2000

بعض لحظاتهم المؤثرة

على مر سنين جوازهم، قدر الثنائي إنهم يحافظوا على التوازن بين إنهم يظهروا فخرهم بنجاحات بعض واعتزازهم ببعض، وفي نفس الوقت يحتفظوا بخصوصيتهم ومساحتهم الشخصية بعيد عن الأضواء.. ولكن حلمي كان بيحرص دايمًا إنه يظهر للكل قد إيه هو فخور بنجاحات زوجته، وكمان هنلاحظ في صورهم قد إيه في حب بينهم مبيتغيرش على مر السنين.

آخر كلمة: عيد سعيد للثنائي المفضل للجميع! ماتفوتوش قراءة: “في ذكرى ميلاده الـ 71.. تعالوا نفتكر أهم أعمال إمبراطور السينما المصرية أحمد زكي“.

تعليقات
Loading...
Tweet
Share
Share
Pin