في الدورة الـ 42 لمهرجان القاهرة السينمائي الدولي، اللي بيعتبر من أهم المهرجانات العريقة لواحدة من أقدم البلاد اللي قدمت أفلام أثرت في تاريخ السينما العالمية ونجوم كانوا ومازالوا علامات مميزة في عالم الفن.. هنشوف دورة جديدة وفعاليات ومسابقات لأفلام مختلفة من كل دول العالم، وده طبعًا مع الحفاظ على كل الإجراءات الاحترازية لسلامة الجميع من فيروس كورونا، فتعالوا نعرف تفاصيل أكتر عن الأفلام المشاركة في المهرجان السنادي وعن المسابقات والجوائز، وكمان القصة ورا البوستر الرسمي للمهرجان.
المهرجان هيقام من 2 لـ 10 ديسمبر الجاي، وهيشارك فيه 84 فيلم من 42 دولة، بعد ما تم تقليل عدد الأفلام عن كل سنة بسبب انتشار فيروس كورونا، والأفلام دي منها 12 فيلم هيتعرضوا في عروض على السجادة الحمراء بحضور صناع العمل، و21 فيلم لمخرجات، وده لدعم التكافؤ بين الجنسين، و20 فيلم هيكونوا عرض عالمي أول، كمان تم زيادة الجوايز المالية السنادي، بعضها من المهرجان وبعضها من الرعاة والشركاء زيّ جايزة الجمهور وجايزة أفضل فيلم عربي، وجايزة لأفضل فيلم يعرض قضايا المرأة، والمهرجان هيكرم في حفل الافتتاح الكاتب الكبير وحيد حامد بجايزة الهرم الذهبي التقديرية لإنجاز العمر، والفنانة منى زكي بجايزة فاتن حمامة للتميز.
فيلم الافتتاح لدورة السنادي هيكون فيلم “الأب”، وهو من إخراج الفرنسي فلوريان زيلر، واتعرض في مهرجان تورنتو، وهو فيلم إنساني.. وبيشارك في المسابقة الرسمية للمهرجان السنادي 3 أفلام مصرية هما: “حظر تجول” للمخرج أمير رمسيس، وبطولة إلهام شاهين وأمينة خليل وأحمد مجدي، وفيلم “عنها” إخراج إسلام العزازي في عرضه العالمي الأول، والفيلم التسجيلي “عاش يا كابتن” للمخرجة مي زايد، في عرضه الأول بالشرق الأوسط وأفريقيا.
وأعلنت إدارة المهرجان عن البوستر الرسمي للدورة الـ 42 من المهرجان، بتصميم وراه قصة لطيفة أوي، بتظهر فيه رمز المهرجان “إيزيس” وهي شايلة الهرم الذهبي، و42 هرم ذهبي موجودين على النيل في أماكن مختلفة، وده جاي من قصة إيزيس وأوزوريس، لما حاولت إيزيس ترجع النور لمصر بعد الظلام بإنها تجمع أجزاء جسد أوزوريس اللي عددها 42 قطعة اتوزعت على أقاليم مصر، البوستر من تصميم زياد السماحي من شركة FP7، وأشرف على تنفيذه المخرج هشام فتحي، وعمر قاسم المدير التنفيذي للمهرجان.