“الممتنعة تستحق الضرب”: عبد الله رشدي ينشر أفكار مسمومة بتصريحاته عن الاغتصاب الزوجي

بعد ما شوفنا تصريحات ندى طليقة تميم يونس واللي أعلنت فيها إنها اتعرضت للاغتصاب الزوجي، وبعد مسلسل لعبة نيوتن لما اتكلم عن الموضوع من خلال مشاهد بتوصف الجريمة دي، رجعت من تاني قضية الاغتصاب الزوجي على الساحة، ورجع معاها الجدل والتصريحات اللي أحيانًا بتبقى تصريحات منصفة للستات وأوقات تانية بتجلد فيهم بدون أي وجه حق.

وكان من ضمن التصريحات دي واللي سمعناها مؤخرًا، كلام اتقال على لسان عبد الله رشدي بخصوص الموضوع، وكالعادة تصريحاته بتضايق معظم الناس على السوشيال ميديا وبتثير الجدل حوليها، وبيسألوا هو جايب الكلام ده منين ومستند على أي مرجع؟

لإن في وقت اللي احنا شايفين فيه إن عملية الاغتصاب الزوجي تعتبر أكبر إهانة للمرأة واعتداء على حقوقها وإنسانيتها، أستاذ عبد الله شايف حاجة تانية خالص، من وجهة نظره إن اللي ترفض معاشرة زوجها دون عذر قهري حرام! وتعتبر ملعونة وتستحق إن جوزها يأدبها بالضرب! ولو ماوافقتش من حقه إنه يطلقها!

أي دين بيتكلم عنه عبد الله رشدي بالتصريحات دي؟ دين الإسلام؟ اللي كرم وعزز المرأة واداها كل حقوقها؟ واللي قال استوصوا بالنساء خيرًا”؟ واللي وقت ما ذكرهم ربنا وذكر المعاشرة الزوجية قال إن المعاشرة تبقى بالمعروف؟ أنت قصدك على الدين الإسلامي بكلامك ده؟ ولا تقصد دين تاني؟ علشان حتى مفيش دين تاني، مفيش دين سماوي نزل بيقول الكلام ده.

عَاشِرُوهُنَّ بِالْمَعْرُوفِ فَإِن كَرِهْتُمُوهُنَّ فَعَسَى أَن تَكْرَهُواْ شَيْئًا وَيَجْعَلَ اللّهُ فِيهِ خَيْرًا كَثِيرًا» (النساء: 19)

بس في ناس بتحب تحور الأيات على مزاجها وعلى حسب أهوائها وكل ده بإسم الدين. والحقيقة دي مش أول مرة يقول فيها عبد الله رشدي تصريح بيهاجم فيه المرأة بشكل مباشر، وقت ما كان كل الناس كانت بتعمل حملات بتدافع فيها عن البنت وبتهاجم فيها التحرش وبتعتبره فعل مشين، كان عبد الله رشدي بيرمي كل اللوم على البنت ولبسها! وبيقول إن مش من الطبيعي إن البنت تخرج بهدوم ماتنفعش غير للنوم، وبعدين تشتكي من التحرش!

رسالة إيه اللي عايز يوصلها الشخص ده؟ إن الناس تنفر من الدين؟ الناس اللي زيّ دي بتنشر أفكار مسمومة في المجتمع وبتطلع أجيال من الشباب فكرهم عن المرأة إنها مجرد سلعة! لازم كل اللي بيروج للمعتقدات اللي زيّ دي، يقف عند حده خصوصًا لو كان صاحب صوت مسموع، و في نفس الوقت خطر على الشباب اللي لسه ماكونوش عندهم أي فكر، لإنهم بسهولة جدًا يمشوا ويصدقوا كلامه.

أخر كلمة: ماتفوتوش قراءة: 6 أنواع مختلفة من الجرائم الزوجية شوفناها في مسلسلات رمضان 2021

تعليقات
Loading...
Tweet
Share
Share
Pin