المينيماليزم Minimalism هو أسلوب فني ظهر في منتجات العالم بعد الحرب العالمية التانية، وبدأ يظهر بشكل كبير في الفنون البصرية وحتى فلسفة المجتمعات الغربية بالذات في فترة الستينات من القرن الماضي.
المينيماليزم، زيّ ماهو واضح من اسمه هو أسلوب فني يتميز بالتبسيط، وبيحاول يقلل من التفاصيل والعناصر الموجودة في العمل الفني أو المحيط اللي بيشتغل فيه على قد ما يقدر، ومع تقليل التفاصيل والعناصر الموجودة في المحيط ده بيبدأ المينيماليزم يركز على إبراز جماليات العناصر والتفاصيل القليلة اللي بيستخدمها.
دخل المينيماليزم في كل مجالات الفن والحياة بعد الحرب، زيّ العمارة والتصميم الداخلي والرسم والتصوير والأزياء، ولقى طريقه حتى للفلسفة مع ظهور فلسفة الوجودية existentialism على ايد الفيلسوف الفرنسي جول بول سارتر وصديقته سيمون دي بوفوار واللي بتهتم بالتركيز على الإنسان ودراسته وفهمه كوسيلة لتحليل الواقع الحاضر والبحث عن معنى الحياة، وأهملت أي عنصر تاني غير الإنسان والملموسات اللي بتأثر عليه بشكل مباشر وواضح وقابل للقياس.
المينيماليزم كفن لتبسيط الحياة
زيّ ما المينماليزم لقت طريقها للفنون البصرية والعمارة والتصميم والفلسفة، لقت طريقها للبيت عندي، ولما بدأت استخدم المفهوم ده في تنظيم محتويات البيت لاحظت فرق كبير جدًا سواء من الناحية الجمالية أو العملية، وساعدتني في التحرر من الخوف والقلق ومن الثقافة الاستهلاكية والتركيز على الحاجات المهمة في الحياة.
ومش معنى كده إني بطلت أشتري ماديات أو وقفت الاستهلاك خالص، لكن نقدر نقول إنها ساعدتني أفهم إزاي أقلل من القيمة اللي بديها للحاجات المادية حوليا.
يمكن لإننا بنميل ندي الحاجات المادية قيمة مبالغ فيها وبالتالي بقينا بنستغنى عن صحتنا وعلاقاتنا وعواطفنا ونمونا الشخصي علشان نمتلك فلوس تساعدنا نمتلك أشياء مادية، وبقينا بنعيش ضمن ثقافة الشراء المستمر حتى لو كنا مش محتاجين للحاجات اللي بنشتريها دي واللي بنلاقيها مرمية ومكدسة حولينا في البيت، واكتشتف إننا لما بنتخلص من الحاجات الزيادة دي بنلاقي التركيز على صحتنا واكتشاف الهدف من حياتنا أسهل.
من خلال ادخال مبدأ البساطة في حياتك والوصول للسعادة الحقيقية مش السعادة اللي بتيجي من امتلاك حاجات مادية ولكن من خلال الحياة نفسها والمهم والتركيز على الضروري في حياتك، وده ممكن تحققه من خلال:
حدد هدفك من تطبيق مبدأ المينماليزم
حدد الأهداف اللي عايز تحققها من تطبيق مبدأ المينماليزم في حياتك، هل عايز توفر فلوس ولا عايز تقلل الزحمة اللي بتسببها الحاجات المادية الكتير اللي حوليك في البيت أو في أي مكان؟ لازم تعرف هدفك إيه علشان تعرف تحققه وتفهم الخطوات اللي لازم تبدأ بيها. يعني أنا مثلًا كان هدفي إني أتخلص من الحاجات الكتير اللي مش بستخدمها ومسببة زحمة في البيت.
نضف بيتك بطريقة المينيماليزم
في حاجات كتير بنسيبها حولينا في البيت ومش بنعرف نرميها، زيّ علب المنتجات اللي بنشتريها وبنستخدمها وبنركنها في البيت علشان فاكرين إننا هنحتاجها، أو الحاجات اللي مكسورة أو بايظة وبنقول إننا هنصلحها بس ده مش بيحصل، الحاجات دي بتاخد مساحة كبيرة من بيوتنا ولما بنطبق مبدأ البساطة عليها هنكتشف إننا لازم نرميها ونتخلص من كل الزبالة والخردة اللي مش بنستخدمها في البيت.
إما تستخدمه وإما ترميه
أول ما هتبدأ تنضف البيت هتلاحظ إن في حاجات كتير أوي استخدمتها مرة واحدة وبعد كده ركنتها وماستخدمتهاش تاني، في قاعدة بسيطة هتساعدك تعرف الحاجات دي مهمة ولا لأ: اسأل نفسك إذا كنت استخدمتها في خلال الست شهور اللي فاتوا ولا لأ، لو كانت الإجابة لأ، يبقى أنت مش محتاج الحاجة دي ولازم ترميها، أما لو الحاجة دي كانت حاجة بتستخدمها في موسم معين بس، زيّ جواكيت الشتاء ولبس البحر؛ اسأل نفسك، هل استخدمت الحاجة دي كتير خلال الموسم اللي فات ولا لأ، لو كانت الإجابة أه يبقى تقدر تحتفظ بالحاجة دي أما لو كانت الإجابة لأ يبقى لازم تتخلص منها وافتكر، احتفظ بالحاجات اللي محتاجها في الوقت الحالي بس مش الحاجات اللي ممكن تحتاجها في مستقبل بعيد.
ارمي كل حاجة مش مفيدة
أحيانًا بيكون في ارتباط عاطفي بينا وبين شوية حاجات حولينا، رغم إن الحاجات دي ممكن مايكونش لها أي قيمة حقيقية عندنا، فلو واجهتك مشكلة ولقيت نفسك مش عارف ترمي الحاجة دي ولا تحتفظ بيها، اسأل نفسك الأسئلة دي:
هل الحاجة دي مفيدة؟ هل الحاجة دي هي الوحيدة من نوعها اللي عندي؟ هل الحاجة دي بتبسطني أو بتحسسني بالحب؟
لو كانت الإجابة أيوة، يبقى خليها، علشان دي حاجة مهمة بالنسبة لك، بغض النظر هي إيه.
قلل المساحة المشغولة في البيت
أهم حاجة بالنسبة لي لما كنت بطبق مبدأ المينيماليزم في البيت كان إني أستغل المساحات اللي عندي بأفضل طريقة ممكنة، يعني مثلًا، ممكن تجيب رفوف من السلك علشان تزود المساحات التخزينية في الدولاب، وممكن تستخدم أدوات التعليق المختلفة في المطبخ والحمام.
الحاجات الصغيرة دي هتخلق مساحات فاضية هتحسسك بالإتساع والراحة، وهتحس البيت رايق وهادي وفاضي كده.
بلاش تشتري حاجات كتير
بلاش تشتري لمجرد إنك عايز تتسلى أو زهقان، ولازم تكتب قائمة محددة بالحاجات اللي محتاج تشتريها والحاجات الضرورية للبيت قبل ماتروح تشتري وأهم حاجة إنك تلتزم بالقائمة على قد ما تقدر، وياريت تلغي الاشتراك في مجلات أو أونلاين شوبينج طالما ماعندكش حاجة في قائمة المشتريات محتاجها من هناك.
كمان لازم تبطل تشتري هدوم كتير، اكتشتف إني لما بشتري هدوم كلاسيكية خامتها كويسة بتعيش معايا وقت طويل جدًا وموضتها مش بتروح مع الوقت، وده ساعدني جدًا بالذات إني شخص بيتعلق بالهدوم بتاعته جدًا، ومش بيقى من السهل عليا إني أتخلص منها.