كارثة اقتصادية: تأثير تعليق حركة الطيران على الكويت

امبارح أعلن رئيس مركز التواصل الحكومي الناطق الرسمي باسم الحكومة الكويتية طارق المزرم، تعليق حركة الطيران التجاري من وإلى مطار الكويت الدولي وإغلاق المنافذ الحدودية البرية والبحرية، وده اعتبارا من امبارح لغاية يوم الجمعة الموافق أول يناير سنة 2021. وبجانب طبعًا ضياع فرصة البعض لتقضية الكريسماس والاحتفال بالسنة الجديدة مع الأهل والأصحاب اللي ممكن كانوا ناويين يسافروا من أو إلى الكويت.. فكمان القرار ده هيسبب خسائر مالية رهيبة للكويت.. وجيه القرار ده نتيجة تزايد حالات الإصابة بفيروس كورونا بشكل كبير في الأسبوع الأخير، وظهور سلالة جديدة من الفيروس.

فقال رئيس مجلس إدارة اتحاد مكاتب السفر والسياحة الكويتي محمد المطيري، إن حوالي 25 ألف تذكرة هيتم إلغائها بعد قرار تعليق حركة الطيران من وإلى الكويت، وده اللي هيخلي إجمالي خسائر قطاع السفر خلال الفترة دي توصل لحوالي 2.5 مليون دينار، وده اللي بيعتبر كارثة اقتصادية بكل المقاييس. لإن طبعًا القطاع السياحي متأثر بشكل كبير من وقت انتشار الوباء، فظهور سلالة جديدة من الفيروس وحظر الطيران مرة تانية سبب ضرر زيادة، وكمان قال إن استرجاع التذاكر بياخد وقت في حدود 60 يوم لحد ما يقدر المسافرين يسترجعوا تمنها.

اللي اتأثر كمان، هما الجالية المصرية المقيمة في الكويت، فمن وقت تفشي الوباء، ترك البلاد ما يقرب من 150 ألف مصري، ورجعوا للقاهرة، حسب كلام أمين عام الاتحاد العام للمصريين في الكويت علاء سليم. وده اللي أكيد أثر على دخلهم وإنهم يلاقوا شغل بديل في ظل الأزمة الاقتصادية اللي بيمر بيها العالم كله.

آخر كلمة: ماتفوتوش قراءة: “الكويت تطرح قانون إقامة جديد لتقليل نسبة المغتربين.

تعليقات
Loading...
Tweet
Share
Share
Pin