“بيضايق عنينا”: أزمة المايوه الشرعى فى شواطئ مصر وآخر القرارات بخصوصه

0

بواسطة ميرهان ياسر.

بعد حوادث التنمر على البنات اللى لابسين المايوه الشرعى أو “البوركيني” ومنعهم من نزول المياه بيه فى بعض القرى والفنادق، ثارت الناس على مواقع التواصل الإجتماعى وبدأت بنات كتير تنزل صورها بالمايوه الشرعى وتشجع بعض على أخذ موقف. و ناس أكتر بدأت تنزل فيديوهات عن مشاجرات فى القرى السياحية بسبب وجود المايوه الشرعى داخل المياه.

View this post on Instagram

طبعا كل الناس اللي عرفانى عارفة انى مش بتكلم او بعلق كتير على حاجة بس حصلت معايا النهاردة.. مشكلة انا شايف انها ماينفعش نسكت عليها عشان دى هتكون مثال لنا و لأخواتنا و زوجاتنا و لأجيال ورانا كتير ولازم الناس دى تتغير ويكون لها عقاب زي ما ابتدينا نتغير و نغير عقول ناس كتير و مرضى كتير فى مجتمعنا.. ده فى مثال واقعى حصل لمراتى النهاردة وانا معاها فى pool فى ستيلا الساحل لقيت سكان جايين يقولولها واحنا فى الماية ماينفعش تنزلى باللبس ده او بالمايوه ده !! قالت ليه بكل استغراب و خوف كما لو كانت عملت حاجة غلط . واحدة عندها شاليه زيها زي اى حد و ييجى ناس يقولوا لها اخرجى عشان انتى لابسة مايوه شرعى و مضايقة عيوننا بيه!!هنا كله لابس بيكينى او one piece وطبعا عشان ناس متتطلعش تقول Stella و نربط مسيحيين معانا أحب اقولك ان فيه بنات و شباب زي الورد مسيحين أكتر من مسلمين و كلهم واحد كانوا بيدافعوا عن مراتى و بيقولوا للناس دي انتو مرضى.. أنا شايف اللي حصل ده عنصرية زيهم زى اللي بيقولوا للي لابسة لبس قصير ماتلبسيش و أكيد دول اللي برده عندهم عنصرية اللون و الدين !!ياريت كل واحد يبقى فى حاله احنا فى #٢٠٢٠ يا ناس كفاية جهل . وفى فديو كمان عشان الناس تعمل share ويشوفوا بعينهم وانا اسف عشان فديو ١٠ دقائق ياريت اسمع آراءكم . Edit: انا والله مش قادر اصدق كم الناس اللي دخلت تدافع عن حق و عن منع العنصرية بجد مبسوط اوى مكنتش متخيل ان الموضوع هيسمع كدا بس الحمدلله ان الناس لسه بخير و بيدافعوا كدا شكرا بجد ليكوا كلكم ❤️ ، ارجو توضيح حاجة تانية يا جماعة موضوع عماد متعب حاجة تانية ملهاش دعوة بيا انا فى الساحل فى Stella وهو فى الجونة ارجو مندخلش المواضيع ببعضها و كابتن عماد متعب على مستوى الشخصى راجل بجد قمة الاحترام لكن الموضوعين مختلفين وشكرا .

A post shared by mostafahassan10 (@mostafahassan10) on

وبعد تقديم العديد من الشكاوى فى اماكن كتير، أصدر اتحاد الغرف السياحية قرارإن المايوه الشرعى مسموح بيه فى كل القرى والفنادق. بالإضافة لكده، على غنيم، عضو مجلس إدارة الاتحاد المصرى للغرف السياحية، قال إن لازم نقدم شكوى لو لقينا أى حد بيخالف القرار ده.

الشىء الغريب ان الناس كانت بتنتقد المايوه الشرعى فى الأول بسبب الخامات الغير مناسبة لنظافة المياه، لكن بعد ما ابتدوا يعرفوا إن الخامة زيها زيّ أى مايوه تانى، ابتدوا ينتقدوه بسبب شكله “الغير لائق” للمنظر العام وإنه “بيوجع العين”.

نشرت منال رستم، أول مصرية ومن أوائل المحجبات فى العالم اللى يتم اختيارها لتجربة البوركيني الجديد من شركة Nike، بوست بتعبر فيه عن غضبها بسبب الناس اللى بتنتقد البوركيني وكتبت: “اللى تاعب حضرتك منظرنا ولا جهل حضرتك؟” و أضافت كمان إن الشركات العالمية بتكرم المحجبات وتعملهم ألف اعتبار وتيجى بلدنا تمنعنا بحجة منع التلوث البصري. 

عن Dazed.

رفض المايوه الشرعى وحرمان العديد من البنات من الاستمتاع بالشاطىء أو حمامات السباحة سلوك عنصرى وغير أدمى،  ومش بيدى أى قوة أو اشارة عن أى قرية او فندق إنهم “A-class”. ده إن دل على شيء، فهيدل على الجهل وعدم التحضر.

آخر كلمة: إحنا أسفين لكل بنت اتمنعت من نزول المياه بسبب المايوه الشرعى.

تعليقات
Loading...