“بيروت المصدر المقدس” مجموعة أزياء إيلي صعب الجديدة المُهداه لعاصمة بلده لبنان

شهدت بيروت في الفترة الأخيرة ظروف صعبة جدًا، من انفجار للتاني ومن مأساة لمأساة، وبقى الشعب مُحاصر بين مشاعر الخوف والغضب، وبين رغبته في إنه يوقف البلد علي رجليها من تاني. فبالرغم من كل اللي حصل، لسة شعب لبنان العظيم بيحارب وبيقاوم، على أمل شفاء البلد ورجوع الحياة في لبنان الجميل لطبيعتها.

وفي وسط المِحن المتتالية، ظهرت كتير من المبادرات واللفتات اللي كلها حب، ومن أخرهم لفتة مصمم الأزياء اللبناني العالمي إيلي صعب، اللي بعد أكتر من شهر علي تدمير منزله بسبب حادثة انفجار مرفأ بيروت، صمم مجموعة الخريف الجديدة من الازياء الراقية، وكرسها كلها كهدية وتحية للعاصمة بيروت، اللي مهما بتتخبط، بتقوم قوية من جديد.

“بيروت، المصدر المقدس” هو الاسم اللي اختاره صعب لمجموعته الجديدة، كناية عن مكانة العاصمة اللبنانية العظيمة، اللي هتحتفظ بيها مهما كانت الظروف. وأرسل المصمم العالمي رسالة حب لبلده، لما كشف النقاب عن مجموعته الجديدة يوم الخميس 10 سبتمبر. واختار صعب موقع تصوير المجموعة الجديدة في غابة، بتظهر فيها عارضات الأزياء وهما لابسين فساتين مصنوعة من الحرير، والتول، والأربطة ذات الطابع الرقيق، بالإضافة للريش اللي بيعتبر من أهم صيحات 2020.

وركزت مقاطع الفيديو علي تفاصيل الفساتين، اللي ظهر فيها الاهتمام بالتفاصيل اللي كانت معقدة وبسيطة في نفس الوقت، فالمجموعة، بتجسد جوهر بيروت المحببة لقلبه.

وكتبت دار صعب على صفحتهم الرسمية على الإنستجرام “تصميمات صعب مع بيروت، بخيالها النابض بالحياة وتراثها الفني الغني. في المجموعة الجديدة، بنستحضر المصدر المقدس، قوة الحياة النابضة التي تسمح لبيروت بالانتصار مرارًا وتكرارًا”، فبعد اللي حصل في لبنان من دمار وخراب، قال صعب إنه مدين لبيروت بعمل حاجة لها في الوقت ده، وبالفعل نزل مجموعته الجديدة بروح لبنانية خالصة.

آخر كلمة: متفوتوش قراءة الموضة ولبنان: سبع براندات عربية تدعم لبنان بعد كارثة انفجار بيروت

تعليقات
Loading...
Tweet
Share
Share
Pin