“بيبو وبشير بيبو والجون”: الذكرى العشرين لماتش ٦-١

عشرين سنة فاتت علي ماتش القمة بين الأهلي والزمالك في الدور التاني من موسم ٢٠٠١ – ٢٠٠٢ أو ماتش ال ٦ – ١ اللي لسه بتفرض نفسها في حالة الجدل اللي بين جماهير الناديين، وده بعد ما حقق الأهلي فوزه التاريخي بنتيجة ٦-١ تحت قيادة واحد من أشهر المدربين في تاريخ النادي وهو مانويل جوزيه.

بيبو ،عبدالمنصف – عن فيلجول

ماتش ٦-١ كانت يوم ١٦ مايو ٢٠٠٢، وهو اليوم اللي بيمثل لجماهير الأهلي ذكرى جميلة واحتفالية بينشروا فيها الكوميكس والبوستات وصور من مانشيتات الجرايد اللي طلعت تاني يوم، وبيفتكروا الجملة المشهورة لمدحت شلبي اللي بقت عنوان للماتش ده وهو “بيبو وبشير بيبو والجون”، وهو في نفس الوقت بيمثل كارثة لجماهير الزمالك اللي مش بتحب اليوم ده ولا الذكرى دي.

تشكيل الفريقين 

خالد بيبو – عن يوتيوب

بدأ الأهلي الماتش بتشكيل فيه عصام الحضري – وائل جمعة – هادي خشبة – شادي محمد – حسام غالي – إبراهيم سعيد – جيلبرتو – سيد عبدالحفيظ – رضا شحاتة – خالد بيبو – أحمد بلال. 

أما الزمالك فلعب بتشكيل فيه محمد عبدالمنصف – بشير التابعي – طارق السيد – رضا سيكا – إبراهيم حسن – تامر عبدالحميد – محمد أبو العلا – حازم إمام – محمد عبدالواحد – جمال حمزة – حسام حسن.

الدوري الموسم ده 

المنافسة على لقب الدوري الموسم كانت مثيرة، ودخل فيها الإسماعيلي كطرف على اللقب بعد سلسلة نتايج سلبية للزمالك في الدور التاني بالتحديد. والماتش ده سجل فيه خالد بيبو أربع أجوال، ورضا شحاتة وإبراهيم سعيد كل واحد جول، أما جول الزمالك سجله حسام حسن، وبعد الماتش الزمالك مشى المدرب الفني الألماني أوتو بفيستر.

بيبو بعد تسجيل واحد من أجوانه الاربعة – يوتيوب

مشاهد مشهورة 

من أول مشاهد الماتش المشهورة هي جملة مدحت شلبي برضه اللي كانت “سيداتي آنساتي سادتي، السلام عليكم ورحمة الله وبركاته الهدف الأول للنادي الأهلي رضا شحاته”، وده لإن نقل الصوت اتأخر والجول جيه في الدقيقة الرابعة.

أما المشهد التاني، فكان جملة مدحت شلبي المشهورة جدًا “بيبو وبشير بيبو والجون” على الجول الرابع لخالد بيبو اللي رقص فيه بشير التابعي مدافع الزمالك.

أخر كلمة: ماتفوتوش قراءة: بالصور: لمحات من تاريخ ديربي كرة القدم المصرية الأهلي والزمالك..

تعليقات
Loading...
Tweet
Share
Share
Pin