بعد نجاح “ما وراء الطبيعة”.. فنانين اتشهروا وعلقوا في ذاكرة الناس من المسلسل

من خلال مسلسل ما وراء الطبيعة، اللي يعتبر نقلة كبيرة في تاريخ الفن المصري، لإنه أول عمل من إنتاج منصة Netflix العالمية، شوفنا مواهب كتير طلعت من صناع المسلسل بكل أدوارهم، وده طبعًا ساعد بشكل كبير في شهرة الفنانين اللي شاركوا في العمل، وخصوصًا إنهم نجحوا في إنهم يعلقوا في ذاكرة المشاهدين حتي لو كانوا أول مرة يشوفوهم، وشوفنا من وقت انطلاق المسلسل تعليقات كتير عن مدى موهبة اللي شاركوا فيه وقد إيه الناس انبهرت بأدائهم وبيتمنوا يشوفوهم في أعمال أكتر.. فتعالوا نعرف أكتر عن بعض من الفنانين دول.

سماء إبراهيم

في دور “رئيفة”، اللي قدرت تلفت نظر الجمهور من أول حلقة في المسلسل، بشخصيتها المتحكمة، شخصية الأخت الكبيرة اللي بتحل محل الأم في كل حاجة، سماء إبراهيم اللي قدرت تلفت نظر المشاهدين للمسلسل، هي من مواليد الأسكندرية، مصممة ديكور في دار الأوبرا المصرية، ومخرجة وكاتبة وممثلة مسرحية كمان، درست التمثيل والإخراج، وكمان النقد الفني وكانت الأولى على دفعتها في أكاديمية الفنون، قدمت عروض كتير في مهرجانات دولية، ومن أشهر الأعمال اللي شاركت فيها كان مسلسل طايع، الحساب يجمع، وليالي أوجيني، شوفناها بدور مميز في مسلسل طايع اللي أخرجه عمرو سلامة، اللي اختارها تاني لدور رئيفة في “ما وراء الطبيعة”.

آية سماحة

في دور هويدا، خطيبة رفعت اسماعيل، اللي قدرت تلفت نظر كل اللي شافوا المسلسل بأدائها المميز، آية سماحة ابتدت مشوارها وهي عندها 11 سنة اشتغلت موديل، وبعدها دخلت المعهد العالي للفنون المسرحية واكتشفها من خلاله الفنان محمد الشرنوبي، ورشحها لدور ضحى في مسلسل جراند أوتيل، اللي كان نقطة انطلاق مشوارها الفني، وشافها المخرج محمد شاكر وبالفعل إداها الدور، وبعد كده طلبها المخرج تامر محسن في مسلسل هذا المساء وظهرت في أدوار مختلفة، لحد ما شافها المخرج عمرو سلامة واقتنع إن دي هويدا حبيبة رفعت.

رشدي الشامي

بدور رضا اسماعيل أخو رفعت، قدم الفنان رشدي الشامي دور مهم وعالمي في مسيرته الفنية اللي بدأها متأخر، هو ممثل ومخرج بترجع أصوله لقرية دهمشا التابعة لمحافظة الشرقية، الجمهور عرفه من خلال أدواره في دراما رمضان في السنين الأخيرة، بمسلسلات مهمة زيّ مسلسل الجماعة، وواحة الغروب، وطايع، وختم النمر، ورغم قلة الأعمال اللي شارك فيها بمسيرته الفنية كلها، إلا إنه خطف الأنظار في دور رضا اسماعيل في المسلسل.

ريم عبد القادر

كل الناس بتتكلم عن شيراز وانتشرت ميمز كتير عن إن الجمهور نفسه بيخاف منها بعد ما شافوا المسلسل، وعلقت في أذهان الجمهور، الطفلة ريم عبد القادر، شاركت في أعمال زيّ مسلسل الطوفان، ولمعي القط، وشبر مية.

آخر كلمة: ماتفوتوش قراءة: “ما وراء الطبيعة” بين عالم الروايات والخيال لشاشة نيتفليكس..

تعليقات
Loading...
Tweet
Share
Share
Pin