بعد موت شاب بسبب قرصة نحلة، اعرف أكتر أنواع غريبة من الحساسية

حالة من التوتر والخوف والاستغراب سيطرت على أهالي قرية محلة منوف، في مركز ومدينة طنطا بمحافظة الغربية، بعد وفاة الشاب نادر خالد الجزار، 32 سنة، سبب قرصة نحلة.

الشاب ده قرصته النحلة وهو بيشتغل ودخل في غيبوبة في الحال وبعدها قلبه وقف. بعد نقله للمستشفى، حاول الدكاترة يعملوا له إنعاش قلبي رئوي بجهاز الصدمات الكهربائية، لكن القلب ماستجابش بسبب حساسية شديدة من قرصة النحل.

الدكتور عبد الناصر حميدة، وكيل وزارة الصحة في الغربية، وضح إن نادر وصل المستشفى في حالة إغماء نتيجة لتعرضه لصدمة تحسسية شديدة بسبب قرصة نحلة، واللي كانت السبب في توقف القلب والموت.

ازاي حد يموت من قرصة نحلة؟

قرصة نحلة
عن: magasl

علشان نعرف إجابة السؤال ده، تواصلنا مع الدكتور أحمد أبو بكر، الأستاذ المساعد في كلية الطب جامعة الإسماعيلية، وقال إن الموت بسبب قرصة نحلة بيكون بسبب نوع من الحساسية بيعمل تفاعل داخل الجسم مع السم اللي بتحقنه النحلة. الحساسية بتحصل بسبب تعرض الضحية لسم النحل في فترة الطفولة أو نوع شبيه من أنواع السم فبيحصل تفاعل شديد داخل جسمه وبيكوّن أجسام مضادة قوية، وفي المرة التانية اللي بيتعرض فيها لقرصة نحلة بتستجيب خلايا مناعية اسمها mast cells واللي بتطلق كميات ضخمة جدًا من مادة الهيستامين في الجسم كله.

مادة الهيستامين هي المادة المسؤولة عن تكون الإلتهابات في الجسم، وفي حالة الصدمة التحسسية الحادة بتوسع الأوردة والشرايين بالذات في منطقة الرجلين وبتضخ الدم كله للجزء السفلي من الجسم، فبالتالي بينخفض ضغط الدم ويقل تزويد المخ والقلب بالدم فبيدخل المريض في حالة إغماء على طول.

لو مالحقناش المريض بسرعة ممكن يتوقف القلب بسبب نقص التزويد بالدم وبيموت المريض. وسألنا أبو بكر ازاي نقدر نسعف المريض على ما توصله المساعدة الطبية المتخصصة، وقال إن أهم حاجة إننا نرفع رجلين المريض عن مستوى الرأس علشان نقلل تركز الدم في الرجلين ونوصله للمخ والقلب.

ووضح إن مضادات الهيستامين تقدر تنقذ المريض في الحالات اللي زيّ دي، فلازم ندي المريض أي مضاد هيستامين سريع ونعمله تنفس صناعي وإسعاف قلبي رئوي سريع علشان توقف عضلة القلب بيحصل في خلال ثواني من تعرض المريض للسم.

أنواع تانية من الحساسية ممكن تسبب الموت

قرصة نحلة
عن: altibbi

أكد أبو بكر إن في أنواع تانية من الحساسية بتعمل نفس الميكانيزم وبتسبب الموت السريع زيّ حساسية النحل، ومن الأنواع دي حساسية البقوليات واللي بتدخل المريض في صدمة تحسسية حادة في حالة أكل أي مواد بقولية؛ الفول والعدس والترمس والحمص والفاصولياء واللوبيا.

ومن الحساسيات الشبيهة هي الحساسية للمكسرات اللي بتشمل الفول السوداني واللوز والبندق وغيرهم، وبتسبب نفس الأعراض واللي ممكن تؤدي لموت المريض.

وعن أكتر الحساسيات المنتشرة عند الشعب المصري، وضح أبو بكر إن في حساسية من أنواع معينة من المضادات الحيوية موجودة في مصر بكميات كبيرة، زيّ حساسية البنسلين، والأوجمانتين، واليونيكتام، وكمان حساسيات من أدوية تانية زيّ الكيتوفان.

ازاي تعرف لو عندك حساسية من حاجة معينة؟

عن: modo3

وضح أبو بكر إن عيادات الحساسية في المستشفيات العام،ة وبالذات المستشفيات الجامعية في مصر، بتوفر تحليل مجاني للحساسية عن طريق تعريض المريض لأنواع مختلفة من المواد الكيميائية والسموم وقياس مدى استجابة المريض لها.

وشجع أبو بكر الناس إنهم يعملوا التحاليل دي علشان يعرفوا إيه المواد اللي ممكن يكون عندهم حساسية منها، وقال إن المعرفة دي تقدر تنقذ أرواح ناس كتير.

أخر كلمة: ماتفوتوش قراءة: الجمال يقتل: تقرير البي بي سي يكشف جائحة عيادات التجميل غير المرخصة في مصر

تعليقات
Loading...
Tweet
Share
Share
Pin