كلام غريب من زوجها بيوحي إنه متهدد، وبيقول مايعرفش حاجة عن هدير وبنتهم حاجة، وبيهدد بالانتحار، وقلق بين المتابعين والبلوجرز والناس بتسأل إيه اللي بيحصل، وناس تقول أحسن دول ناصبين على ناس كتير، يرجعوا للناس فلوسها، قلق انتشر على السوشيال ميديا كانت سببه البلوجر هدير عاطف، إيه القصة؟
اسم البلوجر هدير عاطف تصدر تريند على السوشيال ميديا، وحتى اللي ماكانوش يعرفوها، تضامنوا معاها وكانوا بيدعوا لها تعدي أزمتها.
لكن الرؤية ابتدت توضح بعد ما أعلنت السلطات المصرية القبض على هدير عاطف وطليقها وشقيقته، بتهمة النصب على 16 شخص والاستيلاء على مبالغ مالية بدعوى تشغيلها في البورصة وتجارة السيارات والعقارات، واستغلت في ده صفحتها اللي بيتابعها أكتر من 2 مليون شخص، علشان تجذب ضحايا تحصل على أموالهم وتوهمهم بالأرباح المالية السريعة في مشروعاتها الناجحة.
مين هي هدير عاطف؟
هدير عاطف من أشهر البلوجرز على مواقع التواصل الاجتماعي، وبيتابعها حوالي 2 ملوين ونص شخص، وبتقدم محتوى عن الموضة والأزياء للبنات، وتنسيقات لبس ومكياج وكل الحاجات اللي بتهم البنات، هدير خريجة كلية الإعلام وعندها 27 سنة، واتشهرت بشكل كبير وسط دائرة من البلوجرز وبيتابعها بنات كتير.
أزمتها بدأت لما والدتها طلعت في فيديو بتقول إن هدير اتخطفت وماتعرفش عنها حاجة، في نفس الوقت ده كان طليقها كتب على حسابه الشخصي إنه هينهي حياته وإن في ناس بتهدده، فالناس تعاطفت معاهم ونشرت الخبر على نطاق واسع علشان ينقذوا هدير، وماحدش فاهم اللي بيحصل.
Posted by جريدة الجمهورية نيوز الدولية on Sunday, December 11, 2022
تفاصيل القبض عليها
وزارة الداخلية قالت في بيان صباح يوم الاتنين: “في إطار جهود الأجهزة الأمنية لكشف ملابسات ما أبلغ به 16 مواطنًا باتهام بلوجر أزياء وزوجها -له معلومات جنائية- وشقيقته وزوجها لقيامهم بالنصب والاحتيال عليهم، والتحصل منهم على مبالغ مالية عقب إيهامهم بامتلاكهم مجموعة شركات تعمل في عدة مجالات (السيارات، العقارات، تداول الأوراق المالية) بزعم استثمارها لهم مقابل أرباح مالية، وقيام (البلوجر) المشار إليها بالترويج عبر صفحتها على موقع التواصل الاجتماعي (إنستجرام) لأنشطة تلك الشركات بأوساط متابعيها، وعقب تقنين الإجراءات تم ضبط 3 منهم بنطاق محافظة الجيزة، وبمواجهتهم اعترفوا بتلقى أموال من المجني عليهم بلغت أكثر من مليون جنيه بحجة استثمارها لهم مقابل أرباح، إلا أنهم لم يقوموا بذلك أو يردوا أصل المبالغ، وتم اتخاذ الإجراءات القانونية، وجاري تكثيف الجهود لضبط المتهم الهارب”.
ومن دقائق، تم إعلان القبض على طليق هدير عاطف الهارب، واتقال “ألقت الأجهزة الأمنية بمديرية أمن الجيزة القبض على المتهم الرابع في واقعة البلوجر هدير عاطف المتهمة بالنصب على 16 شخص”. بكده كل المتهمين في القضية تم القبض عليهم، وفي انتظار بيان من الداخلية أو النيابة العامة بآخر التطورات في القضية.