بعد جرائم القتل الكتير مؤخرًا: إيه هو تعريف البلطجة وقانون العقوبات؟

للأسف الفترة اللي فاتت شهدت الشوارع المصرية كتير من أعمال البلطجة وترويع المواطنين، كان آخرهم حادثة حصلت في حلوان، واللي راح ضحيتها صاحب سوبر ماركت أُطلق عليه “شهيد لقمة العيش”. اللي حصل إن مسجل خطر دخل سوبر ماركت وكان عايز ياخد علبة سجاير من غير ما يدفع ثمنها، واللي نتج عنه قتل صاحب السوبر ماركت في العلن أمام الناس لما مارضيش يبيعها له من غير فلوس. أما الحادثة التانية فاتسمت “معركة المرج” اللي راح ضحيتها مواطن أثناء محاولته لفض خناق بين الأهالي في منطقة معروف عنها كثرة حدوث أعمال البلطجة واستخدام الأسلحة النارية.

تعريف البلطجة قانونيًا هو “الأفعال اللي من شأنها الترويع والتخويف والمساس بالطمأنينة”. ولإن ظاهرة البلطجة شيء خطير جدًا وللأسف منتشر، علشان كده القانون بينص على قوانين رادعة تمنع النوع ده من الجرائم وتعاقب مقترفي الجرائم دي بشكل قاسي، تصل إلي الإعدام والسجن المؤبد والسجن المشدد، علشان يكونوا عبرة لغيرهم.

حسب نص المادة 375 مكرر من قانون العقوبات، إنه يعاقب بالحبس على كل اللي يحاول فرض السيطرة والقيام بعمل من أعمال البلطجة بالحبس مدة لا تقل عن سنة وتصل إلى الإعدام لو اقترنت عملية البلطجة بجرائم تانية، زيّ السرقة أو الاغتصاب أو القتل العمد. وبتنقسم جريمة البلطجة لنوعين وهما:

جريمة البلطجة العادية المضافة إلي قانون العقوبات بالقانون رقم 10 لسنة 2011، واللي بتتضمن قيام الشخص نفسه أو تكليف شخص تاني باستعراض القوة أو التلويح بالعنف أو تهديد الأفراد، بهدف الترويع أو التخويف بإلحاق أي أذى مادي أو معنوي بيه أو الإضرار بممتلكاته أو سرقة أمواله أو الحصول على منفعة منه أو التأثير في إرادته لفرض السطوة عليه أو إرغامه على القيام بعمل أو حمله على الامتناع عنه بدون إرادته.. واللي بتكون عقوبته السجن لمدة لا تقل عن سنة. وبتكون المدة سنتين ومش بتتجاوز الـ5 سنوات لو وقع الفعل من شخصين أو أكتر، أو باصطحاب حيوان يثير الذعر والخوف، أو بحمل أي أسلحة أو غيرها من الأدوات الخطيرة، أو لو وقع الفعل على ست، أو على شخص أقل من عُمر الـ18 سنة.

أما النوع التاني فهو جريمة البلطجة ذات الظروف المشددة المضافة إلي قانون العقوبات بالقانون رقم 10 لسنة 2011، اللي بتتضمن جرائم أكبر وأعنف زيّ الضرب اللي بيؤدي إلي الموت واللي بتكون عقوبته السجن المؤبد والمشدد، وفي حالة حدوث النوع ده من الجرائم اللي بتوصل للقتل، مع سبق الإصرار والترصد، فبتكون العقوبة هي الإعدام.

آخر كلمة: ماتفوتوش قراءة “كل اللي محتاج تعرفه عن قانون التحرش الجديد“.

تعليقات
Loading...
Tweet
Share
Share
Pin