سمكري البني آدمين مهنة جديدة انتشرت في مصر واتشهرت بعد فترة بسيطة من ظهورها لأسباب كتير من أهمها هي استخدام المشاهير وجهة للدعايا بجانب الظهور في البرامج والترويج لتكنيك جديد في العلاج الطبيعي بيعتمد على “إعادة تقويم العمود الفقري والمفاصل والعظام”، واللي بنشوف في فيديوهاته بيترقع أجسام الناس بطؤيقة مخيفة ولكن مانننكرش إنها مريحة وبنقول “يااااه احنا عايزين من ده!”. بس دلوقتي وبعد أخر حادثة، تم القبض على “سمكري البني آدمين”.. طب القصة بدأت منين؟
الموضوع بدأ ببوست للفنانة ساندي بتقول فيه إنها في جلسة من الجلسات كان هيعمل لها شلل لإن الغضروف لمس النخاع الشوكي، وحذرت من أي حد يتعامل معاه أو يروح له لإنه نصاب. وبعد تصريحها ده، بدأ الفنانين والمشاهير في التعليق على الموضوع من ضمنهم أمير كرارة لإن الناس اتهمته إنه شارك في دعايا له قبل كده، بس هو طلع في مداخلة وقال إنه راح له مرة واحدة بس وكانت من ترشيح حد من أصدقائه وماكررهاش تاني.
طب وإيه اللي حصل بعد كده؟
نقابة العلاج الطبيعي نزلت تحذير منع التعامل معاه، لإنهم بعد ما فحصوا أوراقه، لقوا إنه عامل تزوير للبطاقة الشخصية وإنه غير مسجل في نقابة العلاج الطبيعي، بس طلع والد المتهم في مداخلة مع عمر أديب ونفى تزوير ابنه لأي شهادة، وقال إنه واخد تلات شهادات، منهم بكالريوس محاسبة وشهادة مهن رياضية وواحدة من أمريكا بس غير معتمدة.
الموضوع خلص على كده؟
بعد كده قررت النيابة العامة حبس “سمكري البني آدمين” وتم غلق المركز اللي كان بيعمل فيه الجلسات. وبعد ساعات من القبض عليه، قال سامي سعد النقيب العام لنقابة العلاج الطبيعي إنه تم القبض على 13 شخص بيمارسوا نفس المهنة. عقوبتهم ممكن توصل لعشر سنين لإنها في الأساس تزوير للمهنة.
مهنة ممارسة العلاج الطبيعى محتاجة شروط معينة علشان نضمن سلامة المرضى عن طريق طرق سليمة ومدروسة ومعترف بيها، لكن المتهم ماستندش لأي مرجع في علاجة للمرضى، هو كان بيقدم العلاج عن طريق حركات مفاجئة بتعمل على فك العضلات وبعدها تحس بالاسترخاء. والطريقة دي مفيهاش أي جانب من الأمان بحسب كلام دكاترة مزاولين للمهنة.