بعد الفوز ببطولة تشارلستون للتنس ودخولها التاريخ.. مين هي البطلة ميار شريف

بعد فوزها على البولندية كاتارزينا كاوا في المباراة النهائية لبطولة تشارلستون الدولية للتنس بأمريكا امبارح، البطلة المصرية الملقبة بـ “فتاة مصر الذهبية” ميار شريف بتدخل التاريخ، وبتحقق إنجاز غير مسبوق في تاريخ التنس بمصر، وتصبح أول لاعبة تنس مصرية تحقق البطولة.

وقالت ميار بعد الفوز إنها بذلت مجهود كبير علشان تحقق البطولة، وإن ترتيبها هيتحسن ما بين المركز الـ 130 و 135 عالميًا، وإن البطولة دي مجرد بداية في طريق تحقيق الألقاب، وكمان أكدت إن هتلعب بطولتين في إسبانيا والإمارات قبل ما تشارك في بطولة أستراليا المفتوحة وهي إحدى بطولات الجراند سلام الكبرى.

وأشاد الجمهور على السوشيال ميديا بمستوى ميار والإنجازات اللي بتحققها وبتخلينا كلنا فخورين بيها وعايزين يبقى فيه زيها كتير، خصوصًا إن مصر فيها مواهب كتير.

ميار مش الوحيدة في عيلتها اللي عندها شغف وحب للعبة التنس، لكنها استمدته من أختها الكبيرة اللاعبة رنا شريف، وشاركوا مع بعض في بطولات جامعية في أمريكا، وهي من مواليد 1996، واتخرجت بشهادة في مجال الطبي الرياضي من جامعة ببردين في 2018، لكنها بدأت في لعب التنس من وهي عندها 5 سنين، ولمعت موهبتها في مرحلة الناشئين ونجحت في دخول قائمة أفضل 50 لاعبة في العالم في سن الـ 16.

المسيرة الرياضية لميار مليانة بالإنجازات والجوائز، اللي تألقت فيها خصوصًا في البطولات الجامعية، وحصلت على جوائز وبطولات فردية كتير، وتم اختيارها لاعبة العام على أكتر من صعيد، أهمهم في مؤتمر الساحل الغربي سنة 2018، كمان أصبحت رابع لاعبة في تاريخ ببردين توصل لنهائي بطولة الرابطة الوطنية لرياضة الجامعات، بالإضافة إلى إنه تم تصنيفها تالت أفضل لاعبة تنس في تاريخ ببردين.

وبعد تخرجها من الجامعة، انطلقت ميار بسرعة الصاروخ في تحقيق إنجازات مسيرتها الرياضية على المستوى الاحترافي، وحصدت 6 ألقاب في دورة كرة المضرب للسيدات، وحققت 71 فوز مقابل 17 هزيمة، منها سلسلة من الفوز المتتالي وصلت لـ 26 مباراة، وبكده وصلت لقفزة للمركز الـ 212 عالميًا، أما في 2020، حققت ميار 16 فوز و 9 هزائم، بنسبة فوز 64%.

آخر كلمة: ماتفوتوش قراءة: لأول مرة في مصر.. “فايزة حيدر” مدربة معتمدة من الاتحاد الإنجليزي لكرة القدم.

تعليقات
Loading...
Tweet
Share
Share
Pin