بعد اعتذار أصالة لأنغام: إيه اللي حصل بينهم وانتهى إزاي؟

بعد فترة من الخلافات بين الفنانة أصالة والفنانة أنغام، شوفنا امبارح بوست لأصالة على انستجرام بتعتذر فيه لأنغام بدون مقدمات وبتقول إنها أخطأت التقدير واعتذرت عن كل اللي حصل منها، وإنه مهما كان رد أنغام فهي هتتقبل، وكمان بتقول إنها كانت عايزة تبدأ بالخطوة دي من فترة وإنها مبسوطة إنها أخيرًا قالت ده، وكتير من الفنانين علقوا على البوست ده ومبسوطين بالصلح وبشجاعة الاعتذار من أصالة، لكن إيه سبب الخلاف وبقاله قد إيه؟

أصالة وأنغام بتجمعهم علاقة صداقة لفترة مش قليلة، لكن الخلاف بينهم ابتدى لسبب عائلي، بعد إعلان زواج أنغام من الموزع الموسيقي أحمد إبراهيم، اللي كان متجوز من ياسمين عيسى ابنة شقيق المخرج طارق العريان، وده كان بداية السنة اللي فاتت، الزواج ده ماتقبلتش أصالة لإنها قريبة الزوجة الأولى لأحمد إبراهيم، وهاجمت أنغام بسبب الزواج ده من غير ما تعاتبها، وعملتلها بلوك على انستجرام.

أنغام بعدها قالت إن أصالة كانت ممكن تتعامل مع الموضوع بشكل شخصي وتكلمها ويتناقشوا في الأمور الشخصية دي، لكن أصالة قالت إن علاقتهم كانت واصلة للأخوة مش مجرد صداقة، وإن التصرف ده اعتبرته خراب بيوت، وإن الموقف ده هيخلي علاقتهم ماترجعش زيّ ما كانت.

لكن بعد انفصال أصالة عن طارق العريان، وانفصال أنغام عن أحمد إبراهيم، وبعد فترة من الخلافات بين أصالة وأنغام، أصالة اعتذرت عن كل ده لأنغام، وردت أنغام ببوست على صفحتها الشخصية على انستجرام، بقبول اعتذار أصالة.

الحقيقة إن بوادر الصلح دي محاولات لأصالة من فترة مش بس دلوقتي، وابتدت بموقف بين ابن أصالة وابن أنغام، اللي بتجمعهم علاقة صداقة قوية ماتأثرتش بخلافات الفنانات، وفي شهر أكتوبر نزلوا صورة ليهم مع بعض، وأصالة علقت عليها وقالت إنها صورة حضارية وعملتلها شير، لكن أنغام ماكنش ليها أي رد فعل.

عن: foochia

آخر كلمة: الاعتذار شجاعة فعلًا وبنتمنى إن العلاقة الصداقة القوية اللي بينهم ترجع زيّ الأول.

تعليقات
Loading...
Tweet
Share
Share
Pin