بعد اختياره لفيلم نتفليكس الجديد.. تعالوا نعرف مشوار مينا مسعود الفني

لما يجي الموضوع للنجومية ففي ممثلين بيحتاجوا إنهم ياخدوا السلم من الأول خالص لحد ما يقدروا ياخدوا بطولة أفلام كبيرة.. وفي اللي بيبقى حظهم أحسن، وبيقدروا من أول تجربة إنهم ياخدوا أدوار كبيرة تخليهم يصنفوا كنجوم صف أول على طول، ومن النجوم اللي حصل معاهم كده الفنان الكندي – المصري مينا مسعود، اللي برغم من إن مشواره الفني بدأ من فترة قصيرة، ولكن بدأنا نسمع عن أعمال كبيرة بياخد بطولتها.

فتم الإعلان عن فيلم نتفليكس الجديد باسم “The Royal Treatment”، اللي هيقوم ببطولته مينا مسعود مع الفنانة الأمريكية لورا مارانو، هو بينتمي لفئة الرومانسي والكوميدي.. والفيلم هيدور حوالين قصة حب بين صاحبة صالون وأمير البلاد، اللي المفترض إنه يتجوز من بنت معينة، ولكن بتدخل في حياته البنت دي وتغير كل حاجة، ومن فترة قريبة سمعنا عن وصول مينا لمصر لعمل فيلم جديد علشان تكون دي تكون أول تجربة ليه في فيلم مصري، وبما إننا بقينا نسمع عن أعمال كتير ليه في الفترة الأخيرة، فتعالوا نعرف أكتر مين هو مينا مسعود.

بدأ مينا مشواره الفني سنة 2011 من خلال تقديم بعض الأفلام والمسلسلات الأجنبية زي فيلم “what happens next” ومسلسل “Poser” اللي كانت أدواره فيها ثانوية. ولكن نقطة التحول الحقيقية بالنسبة ليه كانت لما جاتله فرصة تجسيد شخصية ديزني المعروفة “علاء الدين” سنة 2019، وبعد ما قدم الشخصية دي، لقى الفيلم نجاح وصدى كبير عند الناس، وده اللي خلانا نسمع عنه أكتر في الفترة الأخيرة ونبدأ نشوفله أعمال كبيرة. ومينا من أصل مصري فوالديه مصريين ولكنهم هجروا لكندا من وهو طفل صغير، وكون إنه من عيلة مصرية، فدي مخليه مصدر فخر كبير للعرب، خصوصًا إن دايمًا مينا بيعبر عن حبه لمصر والمصريين، وده كمان اللي بيخلينا كعرب نستنى أعماله بفارغ الصبر.

آخر كلمة: متشوقين قد إيه إنكم تتفرجوا على فيلم نتفليكس الجديد لمينا مسعود؟

تعليقات
Loading...
Tweet
Share
Share
Pin