بعد إعلان رجوعها للدوبلاج.. شخصيات كارتونية بصوت حنان ترك

انتشر خبر مفرح لكل جمهور حنان ترك، وهو خبر رجوعها للدراما في رمضان الجاي بدوبلاج مسلسل الأطفال “نونة الشعنونة” وده يعتبر أول رجوع ليها بعد غياب فترة كبيرة عن الفن، وانتشرت ليها صورة في الاستوديو وهي بتسجل حلقات المسلسل بالفعل، وتجهيزات لتقديمه في رمضان 2021 بعد تأجيله لفترة كبيرة.

وده خلانا نسترجع ذكريات مسلسلات كارتون عملتها حنان ترك أثرت فينا وكانت جزء من طفولتنا ولحد دلوقتي مابطلناش نتفرج عليها، وده من خلال صوتها اللي قريب للأطفال وصدقها ورقتها اللي طالعين من قلبها وعلى طول بيوصلوا لقلب الأطفال، قدرت حنان تسيب بصمة قوية في عالم الكارتون، فتعالوا نشوف إيه هما.

شركة المرعبين المحدودة

سالي، حبيبة كورتي البعبع “محمد هنيدي”، وأصحاب أقوى قصة حب في الكارتون، واللي كلنا اتعلقنا بشخصيتها في المسلسل اللي يعتبر ركن من أركان طفولتنا الأساسية، ولحد دلوقتي بنحب نتفرج عليه مع إننا شبه حافظينه كله.

سوبر هنيدي

شاركت حنان في المسلسل مع محمد هنيدي في الجزء الأول والتاني، بشخصية حنان خطيبة سوبر هنيدي، والمسلسل من أكتر الحاجات اللي اتفرجنا عليها في طفولتنا بحكاياته المختلفة، كل حلقة بحكاية مختلفة وبعتبر كارتون للكبار مش للأطفال بس والحكايات اللي بيناقشها تهم الكبار.

بسنت ودياسطي

بدور بطولة، شاركت حنان ترك في مسلسل بسنت ودياسطي، اللي بتدور أحداثه في قرية وأبطاله شعبيين، وتعلقنا بالأحداث والشخصيات من صغرنا واتعلقنا بالحكايات بتاعته والتفاصيل ولحد دلوقتي لو شوفناه شغال هنقعد نتفرج للمرة الألف.

بكار

ناس كتير ماتعرفش إن حنان ترك شاركت في المسلسل الأشهر للأطفال “بكار”، وشاركت فيه كراوي للأحداث، كانت بتفكرنا بأحداث الحلقات السابقة، وتعرفنا على ملامح الحلقة الجديدة.

كليم الله

عن: Youtube

قصة “كليم الله” سيدنا موسى عليه السلام في سلسلة مشوقة بتصوّرلنا الحياة قبل ميلاده، وبنشوف فيها الأحداث المثيرة والمعجزات، أهمها معجزة كلام الله سبحانه وتعالى مع سيدنا موسى عليه السلام، حنان ترك شاركت في المسلسل بدور آسيا بنت مزاحم زوجة فرعون، وأدائها الصوتي كان مميز في المسلسل.

آخر كلمة: ماتفوتوش قراءة: أصوات بنحبها ومنعرفش أصحابها.. تعالوا نتعرف عالنجوم المصريين في أفلام ديزني.

تعليقات
Loading...
Tweet
Share
Share
Pin