بعد إطلاق أول خط إنتاج لقاح كورونا بالإمارات: إزاي ده هيفيد العرب؟

أعلنت الإمارات عن إطلاق أول خط إنتاج وتصنيع لقاح الوقاية من فيروس كورونا اللي بتنتجه شركة سينوفارم الصينية، باسم جديد هيكون “حياة- فاكس” وده هيكون مشروع مشترك بين الشركة الصينية ومجموعة “جي42″الإماراتية، والمشروع هيكون ضمن عمليات تنشيط الدبلوماسية الصينية في منطقة الخليج وبيخدم هدف الإمارات لتنويع اقتصادها بعيدًا عن المنتجات النفطية، ولمواجهة انتشار “كوفيد-19”.

 المصنع الجديد في أبوظبي هتبلغ طاقته الإنتاجية 200 مليون جرعة سنويًا، وبيضم 3 خطوط تعبئة و5 خطوط تغليف، “حياة-فاكس” هو أول لقاح لكوفيد-19 يتم إنتاجه في العالم العربي، وده هيفيد الدول العربية بشكل كبير جدًا لإن لما يكون دولة عربية فيها خط إنتاج للقاح دا هيخلي كل دول الوطن العربي تقدر تستورد اللقاح بسهولة، وكمان الطاقة الإنتاجية الأولية لخط الإنتاج المؤقت هيكون 2 مليون جرعة في الشهر لكن ماتمش الإعلان عن المدة اللي هيستمر فيها إنتاج اللقاح.

الإمارات أعلنت إن تجاربها أظهرت أن فاعلية اللقاح بتبلغ 86%، وشركة سينوفارم صرحت إنها محتاجة تقيم نتائج المرحلة التالتة علشان تحدد هل فيه احتياج لإضافة جرعة تنشيطية لجرعتين اللقاح ولا لأ.. الإمارات بدأت حملة وطنية للتلقيح ضد كورونا في ديسمبر، وبقت عندها أعلى معدلات التطعيم في العالم بعد إسرائيل، لكن وجود خط إنتاج للقاح في الإمارات يعتبر نقلة نوعية في مواجهة الفيروس وهتشكل فرق كبير جدًا في المنطقة العربية كلها، وبفضل التعاون ده، ملايين هيحصلوا على اللقاح في الإمارات والوطن العربي والعالم.

آخر كلمة: ماتفوتوش قراءة: الصيني ولا فايزر؟ الدول العربية تستقبل اللقاح الجديد.

تعليقات
Loading...
Tweet
Share
Share
Pin