في خلال يومين من مفاجأة تامر حسني لينا على انستجرام باختياره للأغنية الرسمية لكأس العالم لكرة اليد 2021 “إرفع إيدك”، السوبر ستار المصري نزل الفيديو كليب الرسمي للأغنية على حسابه على يوتيوب، وفعلا الأغنية ماخالفتش التوقعات، بالعكس دي علت عليها، من تصوير ورقص لمزيكا وكلمات، “إرفع إيدك” فيها كل حاجة ممكن تدور عليها في أغنية لمسابقة بالحجم ده، والأجمل من كل ده إن كل حاجة فيها بمجهود مصري، الحاجة اللي بتخلينا كلنا فخورين بالعمل الجميل ده، ومستنيين نشوف الأداء اللي في الافتتاح اللي بالمنظر ده أكيد هيشرفنا كلنا.
الأغنية من كلمات منة القيعي وألحان إيهاب عبد الواحد وتوزيع علي فتح الله وسجلها المهندس جلال فهمي أما الإنتاج فكان على إيد محمد شريف والإخراج الرائع كان من رؤية المخرج الكبير أشرف حمدي.
و من كواليس تصوير الأغنية، تامر نزل فيديو جميل ليه وهو بيتدرب مع الراقصين من ستوديو سينرجي على الكوريوجرافي بتاع الأغنية وفي أقل من 24 ساعة الفيديو جاب أكتر من 700 ألف مشاهدة وكل التعليقات كانت مشجعة وفخورة بالعمل اللي رفع راس كل مصري في كل مكان.
الأغنية مختلفة عن غيرها وده لإنها بتجمع الرابر الصاعد مروان موسى، ومش بس كدا، وكمان فيه جزء من الأغنية بالإنجليزي للفنانة الجديدة صاحبة الصوت المميز هدى الشربيني.
“إرفع إيدك” قدرت في 16 ساعة تحقق حوالي 2 مليون مشاهدة على يوتيوب والتعليقات لمصريين وغيرهم من حوالين العالم مافيهاش غير تقدير للعمل وفخر بيه.
بطولة كأس العالم لكرة اليد هتبدأ بكره الأربعاء 13 يناير وهتستمر لحد يوم 31 من الشهر نفسه، وهيشارك فيها 32 دولة متقسمين على 8 مجموعات، والمباريات هتتلعب في 4 صالات مغطاة، وهما صالة استاد القاهرة الدولي، وصالة العاصمة الإدارية، وصالة 6 أكتوبر، وصالة استاد برج العرب، والسنة دي المنتخب المصري هيكون في المجموعة السابعة وهيلعب الماتش الافتتاحي ضد منتخب تشيلي يوم الأربعاء اللي جاي الساعة 7 بتوقيت القاهرة.
ودي مش أول مرة مصر تستضيف كأس العالم لكرة اليد، أول مرة كانت في سنة 1999، وأنوشكا هي اللي قدمت أغنية الافتتاح في عرض مميز سابق عصره.
وفي 2015 قطر استضافت البطولة وقدمت الحفل الافتتاحي.