بالفيديو: اكتشاف آثري جديد في سقارة بيضم أكتر من 10 توابيت آدمية

اكتشفت وزارة السياحة والآثار المصرية بئر عميق للدفن في منطقة سقارة بمحافظة الجيزة، بالقرب من الأهرامات، والاكتشاف ده بيعتبر كنز آثري فرعوني بيحتوي علي أكتر من 13 تابوت آدمي مقفول من حوالي 2500 سنة، على عمق حوالي 11 متر. والتوابيت اللي جواه توابيت خشب ملونة مقفولة ومرصوصة فوق بعض.

ومن ساعات قليلة نشرت الصفحة الرسمية لوزارة السياحة والآثار فيديو لأول فيلم ترويجي عن الكشف الآثري الجديد للبعثة الآثرية المصرية بمنطقة سقارة.

وتفقد وزير السياحة والآثار الدكتور خالد العناني الموقع، وكان بيرافقه في تفقد أعمال الحفر الدكتور مصطفي وزيري، الأمين العام للمجلس الأعلي للآثار. وهيتم عمل المزيد من الأفلام الترويجية للاكتشاف بمجرد إنتهاء أعمال البحث، وتحديد كل التفاصيل.

الدراسات المبدئية بتقول إن التوابيت في البئر مقفولة تمامًا، ومتفتحتش من وقت إغلاقها أثناء الدفن من 2500 سنة، وكمان من المرجح اكتشاف توابيت تانية حوالين البئر لأنهم لقوا عدد من اللقى الآثرية، والتوابيت الخشبية في النيشات اللي علي جوانب البئر.

ولحد دلوقتي، لسة متحددتش هوية ومناصب أصحاب التوابيت دي، أو تحديد عددهم الإجمالي بالظبط، لكن عمليات الحفر والتنقيب لسة مستمرة، وهيتم الإعلان عن كل التفاصيل الجديدة في الأيام الجاية، وقريب هيكون فيه مؤتمر صحفي في منطقة سقارة للإعلان عن الإكتشاف الآثري ده بكل تفاصيله.

آخر كلمة: متفوتوش قراءة قصور مصر الآثرية: من آثار مُهملة لمتاحف في طور التجديد والترميم

تعليقات
Loading...
Tweet
Share
Share
Pin