في واحد من أجدد معارض معهد باربر للفنون الجميلة أو”Barber Institute of Fine Arts” المتاحة على الإنترنت، نشر المتحف مجموعة من الصور النادرة المأخوذة من الرحلة الملكية البريطانية للشرق الأوسط في فبراير 1862م. الرحلة دي كانت مُخصصة للأمير ألبرت إدوارد ولي عهد بريطانيا وقتها- واللي بقى الملك إدوارد السابع سنة 1901م- بترتيب من والدته الملكة فكتوريا بعد وفاة زوجها الأمير ألبرت علشان تزود من معرفة إبنها بمنطقة الشرق الأوسط تاريخياً وسياسياً ودينياً قبل ما يمسك حكم بلاده.
من أكتر الحاجات المميزة في الرحلة دي هي إنها كانت أول رحلة ملكية بريطانية يتم توثيقها فوتوغرافياً، وده بواسطة المصور البريطاني فرانسيس بيدفورد اللي استخدم أحدث تكنولوجيا التصوير الفوتوغرافي وقتها. وقدر بيدفورد ياخد 200 صورة طول فترة الرحلة اللي استمرت أربع شهور، وكانت بدايتها من مصر مروراً بالأراضي المقدسة في فلسطين، وسوريا ولبنان، وتركيا، وآخيراً اليونان.
ركزت عدسة بيتفورد على الأماكن الأثرية والدينية والصحراء والمناظر الطبيعية في المناطق اللي زاروها، وده على الرغم من صعوبة الأحوال الجوية من ارتفاع في درجات الحرارة مع وجود أتربة في الجو. وكانت النتيجة أكتر من مرضية فالرحلة وثقت أماكن فوتوغرافياً لأول مرة في تاريخها زي بعض المعابد اللي تم تصويرها.
اختار المعرض يعرض 18 صورة من الرحلة اللي أثرت بعد كده في تعاملات الملكة فيكتوريا وحكومتها مع منطقة الشرق الأوسط. وده لأن جولة الأمير خلت الملكة تدرك هشاشة الحكم العثماني للمنطقة وقتها، وأهمية وجود علاقات قوية فيها قبل ما تقوم أي قوة تانية بالسيطرة عليها. وعلشان كده لقينا شوية إجراءات استثنائية بعد الزيارة دي زي إن بريطانيا وثقت علاقتها بحاكم مصر قبل ما تحتلها بشكل كامل سنة 1882م.
معرض “Sights of Wonder” هو أول معرض بيتيحه معهد باربر على النت فقط، وده في ظل الظروف الاستثنائية اللي بتمر بيها بريطانيا والعالم كله بسبب فيروس الكورونا المستجد. ويقدر كل اللي يدخلوا على صفحات المعرض إنهم يشوفوا الصور مع كل المعلومات المتاحة عن الرحلة، وأنشطة الأمير وقتها، وتحركاته، وتأثيراتها على الثقافة في بريطانيا.