أغلى وأغرب الحاجات في الوطن العربي والعالم

كتير من الأغنياء حول العالم وحتى في الوطن العربي بيشتروا حاجات غريبة ومجنونة بأسعار خيالية، يمكن بهدف التميز أو لإنهم عارفين قيمتها، ومن كام يوم دار أزياء “بالنسياغا” كشفت عن سلسلة أو مجموعة من الأحذية الخفيفة.. غريبة جدًا وأسعارها طبعًا عالية جدًا، وهي عبارة عن جزم مقطعة سعرها أكتر من ١٨٠٠ دولار، وأتسببت في جدل كبير على السوشيال ميديا والمواقع الكبيرة في العالم كله، وده خلانا نرصد لكم في المقال ده أكتر الحاجات الغريبة والغالية، أو بمعنى أصح أبرزها في الوطن العربي والعالم كله.

جزمة بالنسياغا المثيرة للجدل – عن VOGUE

أغلى عربية في العالم 

أغلى عربية في العالم اللي بيملكها الأمير الولية بن طلال – عن bornrich

الأمير السعودي الوليد بن طلال عنده هوايات كتير أبرزها جمع العربيات، وده خلاه يشتري عربية مميزة وفريدة من نوعها في العالم وهي عربية مصنوعة من الألماس من أول جسم العربية لحد العجلات، وده بيخليها أغلى عربية في العالم وتمنها بيوصل ل٤٨ مليون دولار، الأمير الوليد ولإنه رجل أعمال قرر الاستفادة تجاريًا من العربية دي عن طريق دفع ألف دولار لكل واحد نفسه يلمسها بس.. العربية دي كشف عنها لأول مرة في ٢٠٠٧ في دبي في احتفالية بمناسبة الذكرى الخمسين لشركة مرسيدس.

أغلى كب كيك في العالم

“العنقاء الذهبية ” أغلي كب كيك في العالم بدبي – عن abc

في دبي قرر واحد من الأماكن في دبي مول تقديم حاجة فريدة يخش بيها التاريخ وهي أغلى كب كيك في العالم وسماها “العنقاء الذهبية”، والعنقاء هو طائر أسطوري جسمه وشكله مش معروفين بس موجود في القصص التاريخية الخيالية والأساطير بيكتبوا عنه في حواديتهم. 

الكب كيك ده تمنه ألف دولار، وبيتقدم في طبق معمول من دهب عيار ٢٤ ، ومتزين بالدهب والشكولاتة الصالحة للأكل طبعًا.

أغلى ساعة في العالم

ساعة باتيك فيليب الأغلي في العالم – عن GQ

باتيك فيليب هي واحدة من أقدم وأشهر شركات تصنيع الساعات في سويسرا والعالم، وهي اللي صنعت أغلى ساعة في العالم دلوقتي، وهي عبارة عن ساعة مصنوعة يدويًا من الدهب الخالص وأتصممت على إيد باتيك فيليب نفسه، وبتتكون من ٩٢٠ جزء و٤٣٠ مسمار وجواها ٧٠ حجر كريم.

الساعة بتحدد مراحل دوران القمر وساعات الشروق والغروب، وأتباعت لأول مرة ب١٥ ألف دولار سنة ١٩٣٣، وبعدين سنة ١٩٩٩ أتباعت تاني لأمير قطري وهو الشيخ سعود بن محمد آل ثاني ب١١ مليون دولار، وفي ٢٠١٤ أتعمل عليها مزاد وأتباعت ب٢٤ مليون دولار لمشتري مجهول على الإنترنت ماكشفش عن نفسه.

أغلى كتاب في العالم

بيل جيتس منع كتاب ليناردو دافنشي “الاختراعات” – عن Gatesnotes

مين فينا مايعرفش الفنان “ليوناردو دافنشي” صاحب لوحة الموناليزا اللي هو واحد من أشهر وأبرز الفنانين في عصر النهضة، دافنشي كان مخترع مهم في عصره ولحد دلوقتي، وكان عنده كتاب خاص بيرسم فيه تصميمات اختراعاته واتسمى كتاب “الاختراعات“، وده يُعتبر أغلى كتاب في العالم بعد ما أشتراه بيل جيتس سنة ١٩٩٤ ب٣٠ مليون جنيه في مزاد.

أغلى يخت في العالم

تويخت الملياردير الروسي رومان ابراموفيتش “إيكليبس” – عن اوتو ريفليوشن

كلنا سمعنا وشفنا أخبار مصادرة يخوت رجال الأعمال والمليارديرات الروس الفترة الأخيرة بعد الأزمة في أوكرانيا، وعلى سبيل المثال مالك نادي تشيلسي عنده يخت هو الأغلى في العالم وقيمته بتوصل ل ٥٠٠ مليون دولار، اليخت اللي اسمه “إيكليبس” أو الكسوف طوله ١٠٠ متر، وفيه رادار بيرصد الصواريخ وعليه مهبط طيارات هليكوبتر وطبعًا حمام سباحة، ده غير صالة الديسكو والسينما وصالون الحلاقة والمطعم.

أخر كلمة: ماتفوتوش قراءة: بعد إعلان الوفاة رسميًا، آيبود ووكمان كرمز ثقافي في العالم العربي

تعليقات
Loading...
Tweet
Share
Share
Pin