المصري اللي ابتدى بالعالمية: جميل راتب ومشواره الفني

طبيعي يبقى الفنانين عندهم هدف الوصول للعالمية، وحلم العالمية بيراودهم وممكن يبقى هدف بيخليهم يشتغلوا أحسن أو بتكنيك يوصلهم للسينما العالمية يومًا ما، لكن الغريب واللي مش مألوف، فنان بدأ مشواره من العالمية بعدين اشتغل في مصر، على عكس كل الفنانين.. جميل راتب ومشوار فني ابتدى من فرنسا وكنا محظوظين بوجوده في السينما والدراما المصرية بأدوار ماحدش يعرف يعملها غيره، في مشوار فني بدأه من حوالي 70 سنة، فيه حوالي 174 عمل فني.

جميل راتب أتولد في القاهرة لأب وأم مصريين، ودخل مدرسة الحقوق الفرنسية، وبعد أول سنة دراسة سافر باريس علشان يكمل دراسته هناك. بدأ التمثيل في فرنسا لإنه كان عايش هناك، وكان بيمثل مع الفرقة المسرحية الكوميدية “فرانسيز” وقدموا عروض مسرحية متنوعة وشارك راتب في عرض مسرحية “الوريث” مع الفرقة سنة 1952.

رغم إن أدواره في الأفلام العالمية مش مشهورة، أو مش معروفة لينا كجمهور عربي، لكن جميل راتب شارك في أفلام عالمية كتير، من ضمنهم إنه شارك بدور صغير في الفيلم الأمريكي المشهور “لورانس العرب” مع الفنان العالمي عمر الشريف. جميل راتب رجع مصر وبدأ يشارك في أعمال فنية وسينمائية فيها، منهم فيلم “أنا الشرق”، ولعبت دور البطولة الممثلة الفرنسية كلود جودار وكان معاها الفنان جورج أبيض وحسين رياض وتوفيق الدقن.

بين حكم البهز وحكم جدو أبو الفضل

من الحاجات الجميلة، إن جميل راتب عرف يقنعنا في دور المعلم الكبير تاجر المخدرات، وقدر كمان يقنعنا إنه الجد الطيب اللي ربّى أسرة على الفضيلة والاحترام والقيم والمبادئ.. تشوف المعلم بهز في فيلم الكيف وهو بيقول حكم لمزاجنجي، وتشوف جدو أبو الفضل وهو بيقول لونيس ابنه حكم برضه. بس شوف الفرق بين الحكم دي والحكم دي:

دور الشيطان

واحنا بندوّر وندعبس، لقينا أدوار مش مشهورة للفنان جميل راتب، فبدل ما نتكلم عن أشهر أدواره اللي معظمنا بيحبها، قولنا نتكلم عن الأدوار اللي مش معروفة دي، ومنهم لما جميل راتب عمل دور الشيطان في مسلسل قديم اسمه “الكعبة المشرفة”، وأخدنا بالنا منه عن طريق تعليق شخص على الفيسبوك بيقول إنه بيخاف من الدور ده حتى وهو كبير، ولما جبنا صورة للدور خوفنا فعلًا.

ممثلين كتير ماعندهمش الجرأة لتجسيد دور الشيطان في أعمال فنية، وكمان مش كل اللي كان عندهم الشجاعة دي وقدموه نجحوا فيه. ودي الفكرة إن جميل راتب قدم أدوار متنوعة فعلًا.

من التمثيل للإخراج

عن: المدن

من الحاجات اللي ناس كتير ماتعرفهاش إن جميل راتب خاض تجربة الإخراج المسرحي وقدم مسرحيات كانت من تأليف عمالقة في مجال الأدب، زيّ مسرحية “الأستاذ” من تأليف سعد الدين وهبة، ومسرحية “زيارة السيدة العجوز” اللي مش بس أخرجها ده كمان شارك في إنتاجها مع الفنان محمد صبحي، ومسرحية “شهرزاد” من تأليف توفيق الحكيم.

أخر كلمة: ماتفوتوش قراءة: أفلام صنعت عالمية “لورانس العرب” عمر الشريف

تعليقات
Loading...
Tweet
Share
Share
Pin