بعد ما اتعرضت امبارح الحلقة الأخيرة من الجزء التاني من مسلسل اللعبة “ليفل الوحش”، اللي من بطولة هشام ماجد وشيكو، ومي كساب وميرنا جميل ومحمد ثروت، وبيومي فؤاد، وعارفة عبدالرسول، وسامي مغاوري، وأحمد فتحي، وإخراج معتز التوني، وبيتعرض على شاهد VIP، المسلسل بقى تريند على السوشيال ميديا والناس زعلانة إنه خلص، وجه خبر التحضير لجزء تالت من المسلسل كخبر إنقاذ للمشاهدين اللي مستنيينه وشايفين إن المسلسل عيبه الوحيد إنه خلص.
الناس شايفة إن المسلسل نجاحه معتمد بنسبة كبيرة على كونه كوميديا حقيقية مش مبنية على إفيهات بايخة أو تنمر أو أي حاجة من اللي منتشر بشكل كبير حاليًا، وإنه يعتبر نقلة كبيرة للثنائي هشام وشيكو ووضح كيميا كوميدية لازم يتم استغلالها في أعمال فنية كتير جاية تغير من اللي موجود في الساحة، فتعالوا نشوف رأيهم إيه في المسلسل بعد ما خلص.
وبصراحة إحنا كمان حبينا نقول رأينا في المسلسل، وعجبنا فيه حاجات كتير زيّ كيميا بين فريق المسلسل كله، سواء بين هشام وشيكو اللي دايمًا بنبقى متأكدين إنهم هيقدموا حاجة كوميدية محترمة مش إسفاف زيّ اللي بنشوفه كتير أوي الفترة الأخيرة، وكمان الشخصيات اللي معاهم الصراحة اختيارهم كان موفق جدًا سواء أحمد فتحي أو محمد ثروت، ولا سامي مغاوري وشيكو بيقوله “انت ملط يا بسيوني” وهو مقتنع إنه تمام ومش ملط ولا حاجة، ولا بيومي فؤاد اللي رغم إنه دوره مش كبير أوي زيّ اللي متعودينه منه بس دا “جايبها من تحت.. من تحت أوي”، الصراحة كنا خايفين مستوى الكوميديا اللي بتتقدم بقالها فترة يستمر في الانحدار بس بعد ما شوفنا اللعبة اطمنا إن لسه ممكن نشوف كوميديا زيّ بتاعت زمان بتاعت هنيدي في صعيدي في الجامعة الأمريكية، وعلاء ولي الدين في الناظر.
والجمهور كان متحمس أصلًا للجزء التاني من المسلسل بعد ما خلص الجزء الأول، لإن فعلًا المسلسل يستحق، وكمان علشان المفاجأة اللي حصلت في نهاية الجزء الأول، وهي ظهور أحمد فهمي كضيف شرف في آخر حلقة، وطلع إن هو صاحب اللعبة وهو اللي كان بيكلمهم من ورا الماسك طول المسلسل.