تخيّل المشهد.. أول يوم عيد الفطر، صوت التكبيرات مالي الدنيا، لبسك الجديد جاهز، الضحكة ترسم وشوم الناس، لكن في حاجة واحدة بتخطف انتباهك أكثر من أول ما تدخل البيت.. ريحة الأكل اللي قلبت الجو حفلة!
سفرة العيد مستنياك، والفسيخ والرنجة عاملين استعراض، الكحك بيلمح لك من الركن بحركات إغراء، وكل لقمة بتحكيلك حكاية مصرية خالصة.
من أول ما تبدأ الغدا لحد ما تختم بكحكة سخنة، كل حاجة بتقولك: العيد ملوش طعم من غير الأكلات دي!
أكلات ماركة مسجلة لأول يوم العيد، ماينفعش يعدي من غيرها، وبتعلن بكل فخر: “أهلاً أهلاً بالعيد.. مرحب مرحب بالعيد”!
يا ترى إيه الأكلات اللي المصريين مستحيل يستغنوا عنها في اليوم ده؟
لا تفوّت قراءة: أفضل 10 خيم رمضانية في السعودية 2025: أجواء روحانية وولائم فاخرة تنتظرك!
الكشري.. وحش العيد اللي بيرجع بقوة!
بعد غياب شهر كامل، محلات الكشري بتفتح أبوابها من جديد، والناس بتجري عليها كأنه لقت الكنز المفقود!
السر مش بس في الطعم، لكن في الدقة والعدس والمكرونة، اللي بيخلوا طبق الشارع غير أي كشري بيتعمل في البيت.
الطعم مختلف سواء أكلته في المحل، على عربية، أو حتى في كيس بلاستيك.. وكل طريقة لها متعتها الخاصة.
بس خلي بالك، الكشري مش بيفوت بالساهل.. السعرات فيه بتوصل لـ700 كالوري، يعني “ماتلومش الميزان بعد العيد!”
الكحك والشاي باللبن.. الثنائي البريء!
بعد طبق الكشري الافتتاحي، تيجي مرحلة البيجامة الجديدة وجلسة المزاج مع الكحك والبسكوت والبيتي فور والشاي باللبن.
السقسقة في الشاي لحظة مقدسة، والتحدي الحقيقي إنك تطلع القطعة قبل ما تبوش وتقع.. مهارة مش عند أي حد!
لا تفوّت قراءة: لا تحرم نفسك من حلويات رمضان! اعرف السعرات الحرارية لكل نوع وأفضل وقت لتناولها
الرنجة والفسيخ.. حب من طرف واحد!
بعد الكشري والكحك والبيتي فور، نخش بقى على التقيل.. الرنجة والفسيخ! فقرة العيد الأساسية اللي ناس تستناها، وناس تهرب من البيت بسببها.
معاناة أزلية للبعض، لكن لا شيء يضاهي طبق رنجة متقطع، جنبه بصل وطحينة ولمون.. مع لتر مياه احتياطي!
لا تفوّت قراءة: 9 أنواع حساء لذيذة وسهلة التحضير للإفطار في رمضان خلال أقل من ساعة!
ممبار أو مكرونة بشاميل.. لأعداء الرنجة والفسيخ!
مش كل الناس عندها القدرة على التعامل مع “معركة الفسيخ”، فالأمهات بتجهز البدائل: صينية بشاميل، ممبار، أو محشي، علشان ماحدش يزعل!
الترمس والمكسرات.. تسالي العيد الرسمية
الترمس البيتي اللي الأم بتحضره من أسبوع ده أساسي في العيد، خصوصًا مع مسرحيات زي “العيال كبرت” و”شاهد ماشفش حاجة”.
تمسك طبق الترمس وتقعد تاكل ومش عارف هيخلص امتى، والتسلية تكمل مع شوية مكسرات ولب وسوداني.
وطبعًا كوباية حمص الشام، وشوية بسكوت، ولعلمك الحلبة والترمس والحمص مفيدين وبيساعدوا في تنظيم السكر في الدم!