بجرعة واحدة، ومفعول يوفر حماية مزدوجة من كورونا والأنفلونزا، اللي بنعاني إننا نعرف الفرق بينهم، والناس بتتعامل على إنهم واحد. الصين دلوقتي بتعمل على تطوير لقاح مزدوج المفعول، هيوفر الحماية المزدوجة من الكورونا والأنفلونزا، وحسب وكالة الأنباء الصينية (شينخوا) قدم عدد من الباحثين من جامعة فودان في مدينة (شنجهاي) الصينية اللقاح الجديد فى دراسة تم نشرها في مجلة علم الفيروسات، وقالوا إنهم صمموا مادة مناعية عن طريق دمج مجال ربط مستقبلات “سارس-كوف-2 ” مع ساق “هيماجلوتينين H7N9” المحفوظة.
يعني إيه الكلام ده؟ ببساطة، الدراسة دي وضحت إن باختبار اللقاح المركب ده على الفئران، فهو تسبب بشكل فعال في تحفيز الأجسام المضادة اللي بتستهدف “سارس-كوف-2” وده المسبب لفيروس كورونا المستجد والأنفلونزا، وبكده الأجسام المضادة دي لما يتم تحفيزها بواسطة اللقاح، هتقضي على كورونا والأنفلونزا في الجسم بشكل فعّال.
مش بس دول، لكن كمان التطورات الناشئة منهم، زي “H7N9” ودي سلالة من أنفلونزا الطيور، وبكده، اللقاح هيكون فعال في الحماية من أخطر الفيروسات اللي بتهدد أمن وصحة العالم في الفترة الأخيرة، وكمان من المتوقع إنه يكون سبب رئيسي للحد من الأوبئة الناتجة عن فيروسات الجهاز التنفسي.
الأوبئة الناتجة عن فيروسات الجهاز التنفسي شكلت خطر كبير بداية من الذعر بسبب أنفلونزا الطيور وبعدها أنفلونزا الخنازير، وأكيد كلنا فاكرين الفترات دي من حياتنا كانت عاملة ازاي، وبعدها قابلنا الأخطر، فيروس كورونا المستجد اللي غيّر موازين العالم كله لسنين، ولحد دلوقتي بنحاول بكل الطرق التعافي من الآثار اللي اتسببت فيها الجائحة، سواء صحيًا أو اقتصاديًا، على مستوى العالم كله، ولحد النهارده، خبر زي تطوير لقاح بيوفر حماية من الأوبئة دي، يعتبر طفرة علمية مهمة وهنكون مستنيين نتائجها بفارغ الصبر.