الشركات العربية الناشئة اللي بتعيد تشكيل الثورة الصناعية الرابعة

     بالرغم من كون الشركات الصغيرة أو الناشئة -كما يطلق عليها- هي شركات فعلًا محدودة الإمكانيات في أغلب الأحيان إلا إنها بتلعب دور كبير في الاقتصاد حاليًا. فهما بيوفروا فرص عمل أكتر مما يعني توظيف أكتر واللي بينعكس على تحسن الاقتصاد بشكل مباشر! مش بس كده، الشركات دي بتساهم في حيوية ونشاط الاقتصاد بتاعنا عن طريق تحميس وإثارة الإبداع والمنافسة.

في منتدى الاقتصاد العالمي ومجلس التنمية الاقتصادية البحريني تم اختيار أكتر 100 شركة ناشئة عربية واعدة في 2019. الهدف وراء المبادرة دي هي دمج أكبر رواد الأعمال الناشئين في العالم العربي في حوار محلي ودولي مع مجموعة من قائدي الاقتصاد والحكومات لمناقشة مستقبل الصناعات دي وإزاي تقدر تضيف لمجتمعنا.

دول بعض الشركات المفضلة!

Elves App

التطبيق المصري اللي بيُعتبر زي مساعد شخصي بيلّبي كل احتياجاتك. هو مش زي “Jarvis” ولا حتى “Siri”. هو هيعملّك كل مهماتك سواء كانت مهمة أو مملة؛ فهيحجزلك تذاكر طيران وفنادق، هيختار الهدايا ويوصّلها للشخص المطلوب. كمان هيقترحلك مطعم حلو في القاهرة أو هيخططلك رحلة إجازتك الجاية.

واحد

الأبليكيشن دا مقره في الإمارات ونيويورك وهو أول منصة للاستثمار وفق الشروط الإسلامية أو كما تعرف بالحلال. الشركة تأسست سنة 2015 على إيد “جنيد واحدنا” اللي بيفسر هدف الشركة على إنها أول منصة استثمار أموال آلية بتتبع قواعد الشريعة الإسلامية في العالم، فهي بتسمح للمستثمرين من مختلف فئات الرواتب لاستثمار مدخراتهم بشكل أخلاقي. والجدير بالذكر إن المستخدمين يقدروا يبدأوا استثماراتهم بمبلغ 100 دولار فقط!

Monojo

شركة أردنية في مجال التكنولوجيا الحيوية بتستخدم لبن الجمال لعمل وتطوير الأجسام المضادة. فهي بتصنع وبتبيع سلع مصنعة طبيعيًا ومتطورة جدًا تكنولوجيًا للحفاظ على صحة الفرد.

Proximie

هي شركة بتستخدم الوجود الافتراضي للجرّاحين للمساهمة -عن بُعد- في العمليات الجراحية. الأبليكيشن تم تصميمه من خلال بعض الدكاترة لخدمة الدكاترة وهو بيهدف لتغيير وتطوير مجال الطب بشكل حديث وتكنولوجي.

Swvl

Swvl هو أبليكيشن مصري بيساعد في تسهيل المواصلات عن طريق النقل الجماعي؛ فهو بيوفّر باصات لكل أحياء القاهرة! الناس بيقدروا يتشاركوا في رحلة بالأتوبيس أو الميكروباص، في أي وقت من أوقات اليوم، بأجرة ثابتة مابتتغيرش بسبب الزحمة أو الوقت أو غيرهم.

ملاعب

ملاعب هو أبليكيشن بحريني بيسمحلك تقابل ناس عايزين يلعبوا كورة زيك وتتفقوا على مواعيد وتحجزوا الملعب.

عَكَّاسَة

عَكَّاسَة للإنتاج هي شركة إعلام عمانية بتهدف لتشكيل الإطار الثقافي في دولة عمان.

Epilert

الشركة التونسية الناشئة دي اخترعت سوار بيتلبس في الإيد وبيكشف أعراض الصرع ونوباته وفورًا بيبعت إنذار لأهل المريض أو الطبيب اللي بيعتني بالحالة.

Coded

Coded هي أول أكاديمية لتعليم الترميز أو “coding” في مجلس التعاون الخليجي، تحديدًا في دولة الكويت. هدف الأكاديمية هو تعليم وتدريب المشتركين على الحوسبة والترميز علشان يكونوا جاهزين لسوق العمل.

Clean City M3kod

الأبليكيشن المغربي دا بيهدف لنشر مبادئ المشاركة المجتمعية من خلال تنظيف المدن والمحافظة عليها علشان تكون واجهة جيدة بيفخر بيها الأهالي وكمان الزوار.

FalconViz

هو أبليكيشن سعودي بدأ عن طريق جامعة الملك عبد الله للعلوم والتكنولوجيا. الأبليكيشن بيقدم خدمات رسم خرائط وتقسيم الأماكن زي الأماكن الثقافية والحضارية والسياحية المختلفة باستخدام الكاميرات الطائرة الحديثة.

آخر كلمة: قولّنا رأيك في المبادرات دي بكومنت في الأسفل.

تعليقات
Loading...
Tweet
Share
Share
Pin