الزيادة الأعلى.. يعني إيه رفع وزارة المالية لسعر الدولار الجمركي؟

قررت وزارة المالية رفع سعر الدولار الجمركي ل19.31 جنيه كسعر صرف يتم التعامل بيه مع عمليات استيراد السلع من الخارج، وده بداية من النهارده، الخميس 8 سبتمبر، واللافت في نص القرار إن سعر الدولار الجمركي المحدد بيه هو الأعلى على الإطلاق، وللمرة التانية يبقى أعلى من سعر صرف الدولار المحدد رسميًا من البنك المركزي.

وزير المالية محمد معيط عن المصري اليوم

سعر الدولار الجمركي بالبنك المركزي

البنك المركزي حدد سعر صرف الدولار قدام الجنيه في البنوك بمبلغ 19.22 جنيه للشراء و19.29 جنيه للبيع، وكانت مصر في نهاية يونيو اللي فات قررت رفع سعر صرف الدولار الجمركي من 17 جنيه إلى 18.64 جنيه.

السلع سعرها هيزيد ولا لأ؟

من ناحيتها أكدت وزارة المالية إن رفع سعر الدولار الجمركي مش هيؤدي لزيادة سعر السلع لإنه في كل الأحوال التجار والمستوردين بيحسبوا تكلفة صفقاتهم المستوردة بحسب سعر الصرف في البنوك، مش حسب الدولار الجمركي لو كان أقل من سعر الصرف في البنوك.

إيه الهدف من رفع سعره؟

وقالت الوزارة إن القرار برفع سعر الدولار الجمركي هدفه عمل توازن بين سعر استيراد السلع وسعر الصرف الموجود بالبنوك علشان مايكونش في سوق موازية بتأثر في أداء الاقتصاد.

وعممت الإدارة العامة للتنظيم الجمركي بمصلحة الجمارك المصرية منشور بالقرار في كل المنافذ البرية والجوية والبحرية للعمل بالسعر الجديد لدولار الجمركي، كمان تضمن القرار تحديد أسعار الصرف الجمركية لبقية العملات الأجنبية التانية المتعامل بها في مصر.

إيه هو الدولار الجمركي؟

الدولار الجمركي هو اللي بيدفعه المستورد من رسوم بالعملة المحلية بما يوازي الرسوم الدولارية المفروضة عليه نظير الإفراج عن البضاعة المستوردة والمحتجزة في الجمارك.

وكانت أخر مرة رفعت فيها مصر سعر الدولار الجمركي بشكل شهري قبل ما يتحول لآلية يومية وفقًا لسعر الصرف المعلن من المركزي في يونيو اللي فات لما رفعته 10% ل18.65 جنيه. هاني جنينة، الخبير الاقتصادي والمحاضر في الجامعة الأميركية، قال إن تغيير سعر الدولار الجمركي يوميًا طبقًا لأسعار الصرف في البنك المركزي هو جزء من برنامج مصر مع صندوق النقد الدولي بخصوص القرض المحتمل.

أخر كلمة: ماتفوتوش قراءة: حرب العملات ومستقبل الدولار في الشرق الأوسط والعالم

تعليقات
Loading...
Tweet
Share
Share
Pin