الجو بيبقى أدفى؟ دليلك الشامل علشان تلبس صح الفترة الجاية

الفترة دي الجو بيبقى أدفى، ولإننا عدى علينا شتاء شديد البرودة، فمعظمنا مبسوط جدًا باليومين الدفا دول، لكن المشكلة إن الفترة الجاية دي بيبقى فيها الجو متقلب أوي، وممكن يرجع يبقى برد تاني في أي لحظة.

وفي ناس كتير بيجيلها أدوار برد في الفترة دي من السنة علشان الجو بيضحك عليهم وبيفتكروا إننا دخلنا في الصيف، وأول ما يخففوا لبسهم، بتدخل عليهم أيام برد تلسعهم فيجيلهم برد على طول.

بس في نفس الوقت بيكون الجو دافي بالنهار، وأحيانًا ممكن يكون حر كمان، فمش بنقدر نلبس لبس تقيل علشان بنتعب ونزهق من الحر، طيب نعمل إيه ونلبس إيه الفترة اللي جاية دي علشان نستمتع بالأيام الدافية وفي نفس الوقت مانتعبش من برودة الجو لو عدى علينا أيام باردة؟.. في السطور الجاية هنقدم لك دليلك الشامل علشان تلبس صح الفترة الجاية.

دليلك الشامل علشان تتغلب على تقلبات درجات الحرارة الفترة الجاية

أهم حاجة إننا مانتهورش ونقلع اللبس التقيل ونطلع لبس الصيف ونعتبر نفسنا بقينا في الصيف خلاص. وأهم حاجة إننا نعرف إننا لسه في الشتا، وإن الفترة دي مجرد فترة تداخل فصول، وإننا لازم نفضل لابسين تقيل.

بس علشان اللبس التقيل مايخنُقناش في الأيام الدافية، فالأفضل إننا نتبع النصائح دي:

دليلك الشامل في لبس القطن

أحسن حاجة نعملها إننا نلبس بناطيل قطن وسويتشيرتات قطن، ماتكونش خفيفة أوي ولا تقيلة أوي. ونخلي معانا جاكيت تقيل دايمًا، علشان أول ما نحس إن الجو بدأ يبقى سقعة، نلبسه على طول.

بلاش صوف على اللحم

الصوف بيزود التعرق وده بيزود الإحساس بالحر أوي، فبلاش صوف أصلًا، ولو هنلبس صوف خفيف يبقى لازم نلبس تحته حاجة قطن خفيفة بحيث لو الجو كان حر أوي ينفع نقلع الصوف ونفضل بالقطن بس.

نخلي معانا سكارف أو كوفية دايمًا

السكارف مهم أوي اليومين دول علشان لو الجو بقى برد شوية ولبسنا جاكت ولقينا الجو بقى حر تحت الجاكت ، يبقى السكارف لوحده هيبقى كفاية يدفينا ونحس براحة وننبسط باليوم.

شنطتنا معانا دايمًا علشان نخلي فيها لبس زيادة

زيّ ما احنا عارفين دلوقتي، أهم حاجة اليومين دول إننا نلبس لبس خفيف متوازن، ويفضل معانا لبس تقيل زيادة علشان نبقى مستعدين للسقعة في أي لحظة، وعلشان نفضل متسعدين ولبسنا معانا، يبقى لازم نخلي معانا شنطة نحط فيها اللبس الزيادة ده علشان مانكسلش وننزل من غيره.

نتابع الطقس ودرجات الحرارة

آخر وأهم حاجة إننا نتابع أخبار الطقس ودرجة الحرارة، علشان نعرف قبل ما ننزل درجة الحرارة خلال اليوم هتبقى إيه في المكان اللي رايحينه. ده هيساعدنا نقرر إذا كنا هنلبس خفيف ولا تقيل ولا حاجة ما بين الإتنين.

بس أهم حاجة إننا حتى لو لقينا درجات الحرارة عالية، لازم ناخد لبس تقيل زيادة في الشنطة علشان درجات الحرارة بتقل جامد بالليل في الأيام دي.

آخر كلمة: ماتفوتوش قراءة: لساعات السفر الطويلة: نصائح علشان نتجنب اضطرابات الساعة البيولوجية

تعليقات
Loading...
Tweet
Share
Share
Pin