الإنسان ضد الآلة: العرب بيستخدموا الكتابة من غير نقط علشان يدعموا فلسطين

“بتستخدموا الخوارزميات ضد اللي اخترعوها؟” العرب وخصوصًا المصريين، وهما بيدعموا فلسطين، بهاشتاج أو بوست، لقينا إن الفيسبوك وانستجرام بيمسحوا البوستات اللي بتتكلم عن اسرائيل، وبتوصل في أوقات كتير لحظر الحساب أو الصفحة نفسها لفترة، وده باستخدام الذكاء الاصطناعي والخوارزميات اللي بتتعرف آليًا على الكلمات وتتعامل إلكترونيًا وتمسح وتحظر الحسابات، المصريين استخدموا حيل مختلفة لتفادي الحظر أو المسح، بإنهم يكتبوا الكلمة بفواصل أو حروف إنجليزية في النص، لحد ما انتشر حاجة جديدة، بنحيي ذكاء اللي فكر فيها، وهي الكتابة باللغة العربية من غير نقط، زيّ ما كانت بتتكتب في العصور القديمة، واتحدوا محاولات التصدي للدعم اللي بيحاولوا يقدموه بأي طريقة للقضية الفلسطينية.

في العادي، كإنسان عربي، هتلاقي نفسك عارف تقرأ الكلمات من غير نقط، ولو تفتكروا من فترة كبيرة كان في بوست منتشر كده بيتحدى الناس إنهم هيعرفوا يقروا فقرة كاملة من غير نقط، بناءًا على سياق الكلام، وابتدت الناس تعرف إن اللغة العربية في بدايتها كانت بتتكتب من غير نقط، في عصور الجاهلية وعصر صدر الإسلام، وإن التنقيط تم اختراعه في الأصل لغير العرب، علشان يقدروا يفرقوا بين الحروف ويقرأوا بشكل صحيح.

غير الطريقة اللي انتشرت بإنك تكتب باستخدام رموز في وسط الكلمة أو حروف إنجليزية، طريقة الكتابة من غير نقط دي تعتبر أكتر حاجة اتعملت مختلفة وفيها تحدي من اللي اخترعوا الخوارزميات في الأصل، بطريقة يمكن تضحك، لدرجة إننا شوفنا ميمز كتير على الموضوع ده.

https://www.facebook.com/mustafa.eltayeb/posts/10225955591415401

آخر كلمة: ماتفوتوش قراءة: إزاى الفنانين من حول العالم أظهروا دعمهم لنضال الفلسطينيين في الشيخ جراح والقدس؟

تعليقات
Loading...
Tweet
Share
Share
Pin