الأمل يبدأ معنا: مبادرة جديدة بتشارك فيها نيللي كريم لدعم النساء الناجيات من العنف

الفترة الأخيرة شهدت مجموعة كبيرة من السيدات والبنات اللي ابتدوا يتكلموا عن مواقف العنف والتحرش الجنسي والاغتصاب اللي اتعرضوا ليها، وقرروا يشبوا النيران على مغتصبينهم أيًا كان الثمن حتي بعد مرور وقت طويل على الحادثة. وظهرت كمان منصات اجتماعية جديدة على السوشيال ميديا بتدعم الناجيات وبتضامن مع قضاياهم.

ومن المنصات الجديدة اللي ظهرت على الساحة في الشهور القليلة اللي فاتت هي “إيد واحدة” اللي اتعملت بس علشان تقدر تجسد تضامنها مع كل البنات والسيدات، وتجمعهم كلهم تحت سقف واحد في جو مليان بالتفاهم والدعم. وأطلقت المنصة دي حملة جديدة باسم #الامل_يبدأ_معنا و #أقوي_مع_بعض اللي من خلالها نشرت الفنانة نيللي كريم مقطع فيديو على إنستجرام بتتكلم فيه عن الصدمة اللي بيعشها الشخص بعد ما بيمر بتجربة مؤلمة زي دي.

اتكلمت نيللي في الفيديو عن إن إزاي “في مواقف بتخلي الإنسان مش قادر يكمل وحاسس إن الحياة انتهت” وبعد ما بينت مدى تفهمها واحترامها لكل المشاعر اللي بيحس بيها أي شخص وقع ضحية للتحرش، بدأت تبث الأمل في نفوسهم وتقول إنه “مع بعض” هنقدر نعدي أي صدمة، وأي أزمة نفسية نتجت عن التجربة.

بالإضافة لنيللي كريم، شخصيات عامة كتيرة شاركت في المنصة دي عن طريق فيديوهات بيظهروا مساندتهم للناجيات من التحرش فيها، وبيقولولهم إنهم مش لوحدهم زي تارا عماد، وسارة عبدالرحمن وغيرهم كتير، على أمل إنهم يرفعوا من معنوياتهم ويساعدوهم يدافعوا عن نفسهم، ويتمسكوا بحقوقهم، ويطالبوا بيها مهما كانت الظروف.

آخر كلمة: متفوتوش قراءة: “إيد واحدة” منصة اجتماعية جديدة بتنضم للخطوط الأولى لمواجهة العنف ضد المرأة

تعليقات
Loading...
Tweet
Share
Share
Pin