الأسعار وإزاي تشترك؟ كل اللي محتاج تعرفه عن المرحلة التالتة من “دراجتك صحتك”

تحت رعاية رئيس الجمهورية ووزارة الشباب والرياضة، النهارده هيتفتح باب الحجز الرسمي وهيتم الإعلان عن أكواد الدفع الخاصة بالمرحلة التالتة من مبادرة “دراجتك صحتك” في احتفالية كبيرة لتوقيع تعاون بين الوزارة وإحدى الشركات الخاصة اللي بتعمل في المجال ده، ومن خلال المبادرة هيتم افتتاح مشروع “زود دخلك”، وهيقوم بتوفير فرص عمل للشباب اللي هياخدوا دراجات لزيادة دخلهم، وده بالشراكة مع الشركات الداعمة.

ودلوقتي بقى سهل تشارك في المبادرة دي، والوزارة هتقدم دراجات مدعومة بأقل من سعرها خارج المبادرة في الأسواق، وهتكون بأسعار مناسبة لكل المواطنين، وده بيرجع لمجهود الهيئة العربية للتصنيع، وبنك القاهرة، فلو انت عايز تقدم وتحصل على دراجة، هتسجل عن طريق اللينك ده اللي هيتم تحديثه للمرحلة الجديدة وهيبقى متاح على الصفحة الرسمية الخاصة بوزارة الشباب والرياضة أو البوابة الإلكترونية للوزارة.

وسعر العجلة من المقرر إنه هيكون 1894 جنيه بعد الدعم اللي بتقدمه الوزارة للمستفيدين من المبادرة، أما دراجة البنات بـ 1963 جنيه بعد خصم قيمة الدعم اللي بتقدمه الوزارة بقيمة 500 جنيه، ودراجة البنات متوفر منها 3 مقاسات هما: s 45، وL 10، وxs 45.

وكمان ضمن خطة الدولة للتعايش في وجود فيروس كورونا المستجد، المبادرة بتحقق هدف مهم وهو المساهمة في تنفيذ الإجراءات الوقائية من الفيروس، زيّ التباعد الاجتماعي وتجنب العدوى اللي بيكونوا من خلال استخدام الدراجات كوسيلة تنقل، ورفع معدلات اللياقة البدنية والصحية للمواطن المصري، وتغيير ثقافة الانتقال اليومي للمواطنين.

“دراجتك صحتك” أطلقتها وزارة الشباب والرياضة لحرصها على تنفيذ استراتيجية هدفها تخلي الرياضة أسلوب حياة، وتشجع كل المواطنين إنهم يمارسوا الرياضة بشكل بسيط، ده غير الآثار الإيجابية للدراجات باعتبارها وسيلة انتقال اقتصادية وصديقة للبيئة، الوزارة أطلقت قبل كده مرحلتين من المبادرة، وبعد نجاحهم بتطلق المرحلة التالتة.

آخر كلمة: ماتفوتوش قراءة: حوارنا مع ملك الشطرنج المصري: دخلت أفضل 100 على العالم سنة 2013

تعليقات
Loading...
Tweet
Share
Share
Pin