اقفز كأنك فرعون.. المهرجان العالمي للقفز بالمظلات فوق الأهرامات

انطلق المهرجان العالمي للقفز بالمظلات، اللي بيتم فوق سطح الأهرامات في دورته التالتة اللي بتنظمه شركة Sky Dive Egypt تحت شعار “اقفز كأنك فرعون”.. والمهرجان ده مميز جدًا، وبيجي محبي القفز من كل بلاد العالم، علشان يستمتعوا بالتحليق وشعور “الأدرنالين” وكل ده وهما في سماء الجيزة وبيطلوا على منظر الأهرامات الجميل.

ورغم ظروف كورونا في العالم كله، وإن صعب التنقل بين مدينة والتانية، لكن ده موقفش عائق قدام طريق المهرجان، وكانت اللجنة المنظمة على مستوى المسئولية، وراعوا الإجراءات الاحترازية، ونفذوا المهرجان زيّ كل سنة.. المهرجان كان هيقام في شهر يونيو، ولكن اتأجل علشان كورونا، وبينظمه الإدارة العامة للسياحة الرياضية وتحت إشراف الاتحاد المصري للمظلات والرياضة الجوية.

وقال نائب رئيس الاتحاد المصري للرياضات الجوية محمد إبراهيم صالح إن المهرجان مهم علشان بيروج للسياحة في مصر، وبيسلط الضوء على الرياضات الجوية المصرية، وإن شارك في المهرجان السنادي 120 واحد من 17 بلد منهم أمريكا، والبرازيل، وفرنسا، وانجلترا، وطبعًا دا جنب مصر.

سياح كتير بيستنوا المهرجان ده من السنة للسنة علشان يشاركوا فيه ويجربوا القفز الهوائي، وقال واحد من المشاركين في المهرجان من فرنسا “إن كل مظلي في العالم تقريبًا يحلم بالتحليق فوق الأهرامات ليس فقط من أجل جمال وقيمة الموقع التاريخية، ولكن أيضًا من أجل منطقة الهبوط المثالية والجو الرائع”.

وقال محمود داودي مسؤول اللجنة المنظمة للمهرجان إن القفز بالمظلات فوق واحد من أحد أهم عجائب الدنيا، أهرامات الجيزة العظيمة، هو لحظة خاصة جدًا للكُل، وقال كمان إن شركة سكاي دايف أقامت المهرجان الشهر ده، بعد ما حالات الإصابة بالفيروس قلت، وعادت السياحة بشكل تدريجي.

آخر كلمة: ماتفوتوش قراءة: لأول مرة في تاريخها.. السعودية تستضيف سباقات “فورمولا 1” 2021.

تعليقات
Loading...
Tweet
Share
Share
Pin