“كورونا” مخلتكش تروح السينما.. اعرف أماكن بيع تذاكر الأفلام بمهرجان القاهرة

السنة دي كانت مختلفة شوية، وخصوصًا في السينما علشان فيروس كورونا، ومنزلش إلا كام فيلم بس في الفترة الأخيرة بعد ما الدنيا ابتدت تفتح شوية بشوية، وكلنا تقريبًا بنحب نروح السينما ونتفرج على الأفلام واتحرمنا من المتعة دي الفترة اللي فاتت، بس مهرجان القاهرة السينمائي في دورته الـ 42 هيبدأ بكره، وهيبقى في أفلام كتيرة ومميزة ومن كذا بلد من أنحاء العالم، فممكن تجمعوا أصحابكم وتروحوا تتفرجوا على الأفلام والندوات، مع الالتزام بنسبة إشغال لا تتجاوز 50%، والإجراءات الاحترازية.. فتعالوا نعرف أماكن بيع التذاكر وأسعارها..

أعلن مهرجان القاهرة السينمائي الدولي إنه هيفتح باب الحجز لتذاكر الأفلام بدءًا من النهارده 1 ديسمبر، وهتقدر تحجز من كذا مكان، من خلال موقع شركة تذكرتي، أو من الموقع الرسمي للمهرجان، أو التطبيق الإلكتروني الخاص بالمهرجان على الموبايل سواء للأندرويد والأيفون، وحدد المهرجان مواعيد البيع من مقر المهرجان الرئيسي بدار الأوبرا المصرية النهارده وبكره من الساعة 11 الصبح لحد 3 ونصف العصر، والمواعيد دي هتتغير باقي الأيام وهتبقى من 11 الصبح لحد 10 ونصف بليل، وسعر التذكرة العادية 35 جنيه.

وفي سينما أوديون، هيفتح شباك التذاكر من يوم 3 لحد 9 ديسمبر من الساعة 12 الضهر لحد 11 بليل، وبيبدأ سعر التذكرة من 35 جنيه، وكمان حدد المهرجان قيمة تذكرة الجلسات النقاشية والمحاضرات التي هتقام ضمن فعاليات أيام القاهرة لصناعة السينما، 40 جنيه، وكمان كشف المهرجان عن مزايا بطاقات الصحافة والصناعة والضيوف اللي هتتيح لحاملها إن يشوف الأفلام ويحضر الندوات مجانًا بحد أقصى 4 تذاكر، أما بطاقة الطلاب فتتيح لحاملها حجز 3 تذاكر مجانية في اليوم الواحد.

وكمان في فرصة لمحبي السينما من كل الفئات اللي مقدروش يحصلوا على بطاقات للمهرجان، إنهم يحصلوا على بطاقات أخرى بأسعار مخفضة تتيح ليهم إنهم يحضروا 15 فيلم أو ندوة أو محاضرة، غير شاملة عروض السجادة الحمراء وسعرها 300 جنيه.

ومهرجان القاهرة السينمائي الدولي في دورته الـ 42، هيعرض 83 فيلم من 43 دولة، من بينها 20 فيلم في عروضها العالمية والدولية الأولى، وكمان 52 فيلم في عرضها الأول بالشرق الأوسط وشمال أفريقيا.

آخر كلمة: ماتفوتوش قراءة: إيه الأفلام المصرية اللي شاركت بمهرجان القاهرة السينمائي في آخر 5 سنين؟

تعليقات
Loading...
Tweet
Share
Share
Pin