“اسجد للكلب”: فيديو أثار الغضب لدكتور وممرض بعد انتشاره على السوشيال ميديا.. إيه الحكاية؟

انتشر فيديو بشكل كبير على السوشيال ميديا، لدكتور بيجبر الممرض في مستشفى، إنه يسجد للكلب بتاعه، وبيتعمد يهينه، لإن الممرض أساء معاملة الكلب الخاص بالدكتور، بشكل بشع ومهين، الدكتور قرر يعاقب الممرض بإنه يهينه بالشكل ده، ويقول له “اسجد للكلب” لكنه ماكانش يعرف إنه كمان بيصور فيديو، وبعدها الفيديو انتشر بشكل كبير حاليًا وأثار غضب الناس، تعالوا نشوف إيه اللي ورا الفيديو ده وتصريحات الممرض وتعقيب الجهات الدينية، وهل فعلًا الفيديو كان مجرد هزار؟

الفيديو بيظهر فيه الممرض وهو بيتعرض للإساءة من الدكتور وهو بيعاتبه على عدم معاملة كلبه معاملة كويسة، فقرر الدكتور معاقبة المريض وإهانته اللي وصلت لإنه طلب منه يسجد للكلب بتاعه! لكن الممرض رفض. وفي عرض ومناقشة الفيديو اللي انتشر ده، في برامج تليفزيونية زيّ برنامج الحكاية مع الإعلامي عمرو أديب، تم التواصل مع الممرض نفسه، وقال إن الواقعة دي حصلت من 7 شهور، وكانت صدمة له إنه يشوف الفيديو وإنه ماكانش على علم بتصويره من الأساس، ووضح إن انتشار الفيديو دمر حياته وسَبِب له أذى ومشاكل له ولأسرته كلها بالتأكيد، ولأهل بلده كلهم، وإنه عايز الفيديو ده يتشال من على الإنترنت، ووضح إن الدكتور متعود على الهزار لكن بدون تصوير فيديوهات ونشرها. وإنه لما اعترض على نشر الفيديو، الدكتور رفض يحذفه وقال له الموضوع بسيط ومايستدعاش القلق!

بعد انتشار الفيديو، نقابة الأطباء أعلنت إن مجلس النقابة قرر إحالة الطبيب صاحب الواقعة إلى لجنة آداب المهنة بالنقابة، للتحقيق في اللي تم تداوله في الفيديو، وأعلنت إنه هيتم إعلان نتائج التحقيق فور الإنتهاء منه. وأمين عام نقابة الأطباء طالب بتدخل النيابة العامة للتحقيق في الواقعة.

أما من الناحية الدينية، علق محيي الدين عفيفي الأمين العام لمجمع البحوث الإسلامية السابق في مصر، على فيديو الطبيب اللي طلب من ممرض السجود لكلبه، واعتبر ده “شرك”. وقال: “لا ينبغي لإنسان أن يأمر إنسانًا بالسجود لغير الله”، ووصف اللي حصل في الفيديو المنتشر على مواقع التواصل الاجتماعي، بإنه “عمل غير أخلاقي”.

لا من الناحية الإنسانية ولا الدينية ولا أي حاجة تخلي إنسان يهين إنسان تاني بالشكل ده! وكمان يتفاخر بالفعل ده ويصوره وينشره على السوشيال ميديا، اللي احنا عارفين كويس إننا مش عايشين فيها لوحدنا وإن أي حاجة بتنتشر بسرعة البرق، هل الهزار والضحك والسخرية ممكن يوصلوا لكده! ولا كمان السعي للشير واللايك!

آخر كلمة: ماتفوتوش قراءة: في اليوم العالمي للتمريض: تعالوا نحتفل بأبطالنا من الممرضين في الوطن العربي

تعليقات
Loading...
Tweet
Share
Share
Pin