إيجابي أم سلبي: الفنانين العرب ونتائج تحاليلهم لفيروس كورونا

بعد رجوع كتير من الحفلات والمهرجانات في الفترة الأخيرة، اختلط كتير من الفنانين بأعداد كبيرة من الناس، وده اللي اضطرهم إنهم يعملوا تحاليل علشان يطمنوا على حالتهم، وكمان علشان يحموا اللي حوليهم في حالة وجود المرض.. وللأسف بعض الفنانين اللي حضروا الحفلات، وحتى اللي فضل عدم الاختلاط، أعلنوا إن طلعت نتائجهم إيجابية، وبدأوا مرحلة محاربة المرض.. وكمان طلع البعض التاني وأكد إنه نتيجة تحاليله سلبية علشان يطمن الجمهور.

بسمة – إيجابي

أكدت بسمة خضوعها للحجر المنزلي بعد تأكدها بالإصابة بكورونا، وأنها حذرت كل اللي كانوا مخالطين ليها علشان يأخدوا حذرهم، وكمان قالت إن الأعراض اللي عندها خفيفة وإنها بصحة جيدة.

ويجز – إيجابي

أعلن المغني ويجز إصابته بفيروس كورونا خلال تواجده في الجونة، وقال لكل اللي تعاملوا معاه خلال الأيام اللي فاتت إنهم يأخدوا حذرهم ويقوموا بتحاليل الكشف عن الفيروس.

ميس حمدان – إيجابي

أعلنت الفنانة ميس حمدان، إن للأسف نتيجة المسحة طلعت إيجابي، ولكنها قالت إنها في صحة جيدة وطلبت من الناس إنهم ميحملوش “مهرجان الجونة” أي إصابات بالكورونا.. “محدش ضرب حد على إيده علشان يروح.. كلنا روحنا بإرادتنا”.

أحمد السقا ومها الصغير – سلبي

خضع الفنان أحمد السقا وزوجته مها الصغير للعزل، بعد إعلان الإعلامية المصرية دينا حويق واللي كانت زميلة مها في برنامج “It’s show time” ولكن بعد خضوعهم لفحص الكورونا، أكد السقا إن نتيجة المسحة طلعت سلبية ليه هو وزوجته، وتمنى الشفاء لكل من أصابه المرض.

نشوى مصطفى – إيجابي

على الرغم من عدم حضور الفنانة نشوى مصطفى لمهرجان الجونة أو أي حفلات حصل فيها اختلاط كبير، إلا إن للأسف ظهرت نتيجة المسحة إنها إيجابية وكمان بتعاني من أعراض تقيلة جدًا وصلت لدرجة دخولها المستشفى وهي في حالة سيئة جدًا.

سارة عبد الرحمن – إيجابي

سارة كانت من الناس اللي اكتشفت إصابتها بالفيروس بعد رجوعها من مهرجان الجونة، وكتبت على صفحتها على فيسبوك “أنا عملت تحليل كورونا، والنتيجة طلعت إيجابي للأسف، يا رب يهون على أي حد عنده/عندها كورونا ويارب يشفي الكل.”

أحمد داوود وعلا رشدي – سلبي

View this post on Instagram

@adawoodofficial

A post shared by Ola Roshdy (@ola.roshdy) on

في الأول كانوا شاكين الثنائي أحمد وعلا إصابتهم بفيروس كورونا، بالذات لما طلعت أول مسحة عملتها علا إيجابية، ولكن أحمد كانت سلبية، وعزلوا نفسهم عن الأولاد والكل على سبيل الاحتياط، ولكن في تاني مرة نتيجة المسحة بتاعت علا وأحمد كانت سلبية.

زينب غريب – إيجابي

نشرت زينب “ستوري” على انستجرام وقالت: مسحتي لتحليل الكورونا إيجابية.. أي حد تعامل معايا مباشرة يا ريت يأخذ الاحتياط اللازمة أتمنى الناس كلها تكون بخير”.

أروى جودة – سلبي

بعد إعلان بعض الفنانين إصابتهم بفيروس كورونا بعد رجوعهم من مهرجان الجونة، أجرت أروى تحاليل الكشف عن كورونا، لكنها طلعت سلبية.

ريم العدل – إيجابي

كتبت مصممة الأزياء ريم العدل على صفحتها بالفيسبوك بعد عودتها من مهرجان الجونة “رغم إني معنديش أي أعراض خالص، ولأن الاحتياط واجب ومسؤولية في الظروف دي، عملت تحليل كورونا والنتيجة طلعت إيجابي للأسف”. وقالت كمان إن في بعض الناس بيعملوا تحليل بتطلع إيجابي وبعد ما يعملوا واحد تاني بيطلع سلبي، ولكنها هتعزل نفسها احتياطي لحد ما تتأكد مليون في المية.

هند عبد الحليم – سلبي

هند كانت من الفنانات اللي أجرت التحاليل بعد ما رجعت من مهرجان الجونة للتأكد من صحتها، وبالفعل نتيجة المسحة طلعت سلبية.

آخر كلمة: ألف سلامة للجميع! ماتفوتوش قراءة: بالصور: مشاهير خدوا حذرهم ولبسوا الكمامة في مهرجان الجونة 2020.

تعليقات
Loading...
Tweet
Share
Share
Pin