لأول مرة.. بنات غزة بيدخلوا “رياضات الرجال” بفريق ملاكمة

بأول فريق ملاكمة للسيدات في غزة، من سن 7 سنين، بنات غزة بيقتحموا مجال الرياضة اللي معروف عنها إنها للرجالة ومتنفعش للبنات، وبيثبتوا إنهم يقدروا يكونوا في أي مجال ويتفوقوا فيه وكمان يشاركوا في بطولات دولية، الفريق ابتدى بـ 18 لاعبة، ودلوقتي بقى 45 لاعبة، بستات وبنات غزة اللي بيمثلوا نص عدد السكان هناك.. فتعالوا نشوف إيه حكاية الفريق والبنات اللي قرروا يدخلوا مسيرة الملاكمة.

تحت شعار “الملاكمة مش حكر على الرجالة”، اللاعبات عبروا عن اللعبة وتعلقهم بيها، وقالوا إنها علمتهم يدافعوا عن نفسهم، ويخرجوا الطاقة السلبية اللي جواهم بطريقة صحيحة، وكمان بيشجعوا المرأة على إنها تكون أقوى وأشجع للدفاع عن نفسها من خلال إنها تمارس رياضة الملاكمة، والفريق طموحه يرفع علم فلسطين ويشارك في البطولات المحلية والدولية، وفعلًا هيشاركوا في مسابقات دولية، وأقربهم مسابقة في الكويت هتقام في شهر فبراير اللي جاي.

وفي عز انتشار فيروس كورونا المستجد، وكل القرارات لتنفيذ الإجراءات الاحترازية لمواجهته، واللي منها كان حظر ممارسة الرياضة في القاعات والصالات المغلقة، الفريق مستسلمش، ومدرب الفريق كابتن أسامة أيوب قرر إنه يلتقي بالفريق على شاطئ البحر ويقوم بتدريبهم هناك، مع الالتزام بالتباعد وارتداء الكمامات.

عن: cgtn

آخر كلمة: ماتفوتوش قراءة: كل حاجة محتاجين تعرفوها عن “نفرتيتي بولو” أول فريق بولو للسيدات في مصر.

تعليقات
Loading...
Tweet
Share
Share
Pin