أماكن رائعة لعمل الأفراح في هواء القاهرة الطلق

     وصلنا موسم الأفراح من جديد، ولأن كل حد بيتجوز الأيام دي بيتعب كتير علشان يلاقي مكان مناسب لعمل الفرح فكرنا نسهل العملية بعض الشيء! سواء كنت بتدور على المكان المثالي لفرحك على شواطئ جزيرة لونج آيلاند في نيويورك أو قررت تفضل في البلد جوا نطاق القاهرة، عملنالك قائمة مثالية لأفضل الأماكن المقترحة!

الأفراح الخارجية أو كما تعرف بأفراح ال”Open air” أصبحت أشهر أنواع الأفراح في الفترة الأخيرة بسبب تحول معظم الشباب ليها؛ لأن المكان المفتوح بيضيف نكهة إضافية لأكتر يوم مميز في حياتك وبيخليه ممتتع وهادي ورومانسي، دا غير الصور اللي بتكون أحلى كتير في الأماكن المفتوحة! وبعيد عن كل دا فمن الأسهل بكتير إنك تلاقي شركة بتأجر خيم ضخمة في الخلاء عن إنك تحجز قاعة فخمة بمبلغ طائل من قبل فرحك بسنين!

فلو كنت عاقد النية على الجواز قريب، متنساش تشوف المجموعة الجاية من الصور لأجمل أماكن أفراح الهواء الطلق.

1- عرابي: “Plein Air”

“Plein Air” هي فيلا خاصة تقدر تحجزها لأي مناسبة. أحلى ما في القاعة هو وجود حمام سباحة وحديقة كبيرة بالإضافة إلى خيمة يمكن استخدامها في الأيام شديدة الحرارة، وللأسباب دي وغيرها أصبحت الفيلا مقصد مشهور للشباب المقبلين على الجواز. الأسعار هناك بتتراوح ما بين 20 ألف و25 ألف ل100 فرد وكل فرد زيادة ب175 جنيه.

لمعلومات أكتر عن الحجز ممكن تكلم المسئولين عن المكان على الأرقام دي: 01004987169 و 01208393743.

2- العبور: “Golf City”

المكان دا بيطل على ملعب جولف كبير جدًا ومساحات خضراء هائلة ومريحة للعين. لو انت محظوظ، هتقدر كمان تأجر مع الأرض حمام السباحة والمكان المحيط بيه. وسواء قدرت تحجز المنطقة بتاعة حمام السباحة أو الأرض بس، فانت فرحك هيكون في واحد من أحلى الأماكن المفتوحة في المدينة.

سعر الحجز ل100 فرد بيكلف تقريبًا 22 ألف جنيه وعلى كل فرد زيادة 135 جنيه. وتقدر تتواصل مع جولف سيتي على الرقمين دول: 01284440078 – 01284440058.

3- مدينة 6 أكتوبر: “Swiss Inn Pyramids Golf Resort”

مكان هايل على طريق الواحات بعد دريم لاند، وهو فندق “Swiss Inn Pyramids” الفخم. للأسعار والحجز، اتصل على: 0238553311.

4- مدينة 6 أكتوبر: فندق “Hilton Dreamland”

متمركز في حي دريم بمدينة 6 أكتوبر، حديقة فندق هيلتون دريم لاند هي واحدة من أروع الأماكن المقترحة في القائمة بتاعتنا. المكان بيقدر يشيل حوالي 150 فرد وسعر الفرد بيكون 250 جنيه. القائمين على المكان بيُعتبروا خبرة في الديكور والتزيين. من أول المفارش الكتان الفخمة للشرائط والورود الجميلة، المكان هناك ليه متعة خاصة لو انت من هواة التصميم والأشكال الجمالية. لمعلومات أكتر عن الحجز، اتصل على: 01006956640.

5- مدينة 6 أكتوبر: “Dreamz Valley”

تقدر تأجر الفيلا دي بحوالي 4000 أو 5000 جنيه بس شاملة الكراسي والترابيزات اللي تكفي 100 فرد! سعر خرافي، صح؟

لمعلومات أكتر وللحجز كلم: 01144000067.

6- مدينة 6 أكتوبر: فندق “Novotel”

فندق نوفوتيل أكتوبر بيحتوي على مكان رائع لاستضافة الحفلات بمساحات خضراء ومنظر بديع للصور والاحتفال. للحجز كلم: 0238247400.

7- مدينة 6 أكتوبر: فندق “Hilton Pyramids”

في مدينة 6 أكتوبر على طريق الواحات بيقع منتجع هيلتون بيراميدز اللي هتلاقي جواه مساحة خارجية جميلة ومناسبة للحفلات والمناسبات. الأسعار بتتراوح من 250 ل 350 جنيه للفرد على حسب اختيارات المنيو. لمزيد من المعلومات اتصل على: 0238553333.

8- القاهرة الجديدة: “Katameya Heights”

بالرغم من إن منتجع قطامية هايتس مشهور بمساحاته الخضراء الشاسعة، إلا إن مكان الاحتفالات الخارجي متغطي كله بحجر الفسيفساء أو كما يعرف بالموزايك وبيطل على منظر جميل وهادي. على الأقل مش هتضطري تخافي على كعب جزمتك في أرض الحديقة!

الأسعار بتكون من 300 ل350 جنيه للفرد. لمزيد من المعلومات، كلم: 01014311135.

9- القاهرة الجديدة: “Sky Resort”

واحد من أشهر أماكن الأفراح في القاهرة الجديدة هو منتجع سكاي. بمساحة خضراء مهولة تقدر تشيل عدد أشخاص كتير، بالإضافة إلى مكان أصغر للمناسبات الصغيرة، منتجع سكاي يقدر يخلي أي فرح يكون مميز ولا ينسى.

سعر الفرد بيكون تقريبًا 300 جنيه. للحجز تقدر تزور الموقع التالي: http://www.skyresortegypt.com/.

10- القاهرة الجديدة: “Arabella Country Club”

متمركز في التجمع التالت بجوار الجامعة الألمانية بالقاهرة، نادي أرابيلا الريفي بيستضيف كل أنواع المناسبات الخاصة.

الأسعار بتبدأ من 250 لحد 350 جنيه للفرد على حسب اختيارك من المنيو. لمعلومات أكتر، اتصل على: 01065515405 أو 01065515406.

11- القاهرة الجديدة: فندق “JW Marriott”

فندق الماريوت بيقع على الطريق الدائري قرب مدينة ميراج. النادي جواه فيه مكان جميل بيطل على بحيرة جميلة ومساحة خضراء. سعر الفرد بيكون حوالي 350 جنيه، وللحجز كلم: 0224115588.

12- وسط البلد: فندق “Hilton Ramses”

بمكانه المميز في وسط البلد، فندق هيلتون رمسيس بيحتوي على مكان مفتوح بمنظر رائع بيطل مباشرة على نهر النيل. الأسعار بتتراوح ما بين 25000 و 32000 ل100 فرد ودا بيكون حسب اختيارات الأكل من المنيو. لمزيد من المعلومات، تقدر تكلم: 0225777444.

13- وسط البلد: “Fairmont Nile Towers”

المكان من فوق سطح فندق فيرمونت في وسط المدينة خيالي وبتقدر تشوف من فوق مدينة القاهرة بأكملها، مش بس كده، المكان كمان فيه حمام سباحة رائع بيخلي الأجواء أجمل وأجمل. لمعلومات أكتر، اتصل على: 0224619494.

14- وسط البلد: فندق “Novotel Cairo El Borg”

سطح فندق نوفوتيل وسط البلد بيطل على منظر فاتن للنيل ووسط البلد كلها، المناسبات هناك بتكون مبهرة بالفعل.

الأسعار بتبدأ من 225 لحد 325 جنيه للفرد على حسب اختياراتك من المنيو. لمعلومات أكتر، اتصل على: 0227356725.

15- المطار: فندق “Le Passage”

فندق “Le Passage” بيقع جوا نطاق مطار القاهرة الدولي، وبيحتوي الفندق على حديقة جميلة منفصلة عن باقي الفندق كله. ميزة المكان هناك إنه بيقدر يستضيف عدد كبير من الأفراد بالإضافة إلى مكانه المميز. لمعلومات أكتر كلم: 01207767671.

16- المقطم: “Up Town Cairo”

في حي المقطم بالقاهرة، “Up Town Cairo” هو إضافة جديدة للأماكن المميزة لعمل الأفراح والمناسبات المختلفة بالذات داخل النادي هناك، اللي بيطل على منظر الجبل الساحر. الأسعار بتتراوح ما بين 230 لحد 350 جنيه للفرد على حسب اختيار الأكل. أما عن باقات الترفيه فبتقدر تحجزها بمبلغ إضافي حوالي 10 آلاف جنيه. للمعلومات كلم: 16129.

17- المعادي: “Villa Belle Epoque”

في قلب المعادي، الفيلا الجميلة دي تقدر تحجزها وتستمتع بفرح open air من نوع تاني. لمعلومات أكتر وللحجز، تقدر تتواصل على الرقم دا: 0223580265.

18-  مدينة الجيزة: فندق “Mena House”

ودا واحد من أفضل الأماكن في مصر لعمل الأفراح، مش بس عشان البحيرة الجميلة اللي بيطل عليها والحديقة الخضراء، بس لأنه بيوفرلك واحد من أروع المناظر في العالم جوا الفرح وهو منظر مباشر على الأهرامات. المكان هناك ساحر بمعنى الكلمة وتقدر تاخد فيه أحلى صور ليوم لفرحك اللي مش هيتنسي. لمزيد من المعلومات، اتصل على: 0233773222.

19- مدينة الجيزة: “Taracina”

المكان هناك روعته إنه بيطل مباشرة على النيل فبيكون مميز جدًا للاحتفالات والصور بحديقة كبيرة وأشجار. تأجير المكان هناك بيكلف حجز الفرد فيه 100 جنيه أو 11000 جنيه ل100 فرد مع كل فرد زيادة ب22 جنيه بس (من غير أي وجبات). لمزيد من المعلومات كلم: 01001008476.

20- مدينة الجيزة: فيلا الحرملك

الفيلا المميزة دي بتقع على طريق المريوطية، تقدر تأجرها لأي مناسبة بأسعار تبدأ من 7000 جنيه من غير أي تجهيزات إضافية.

21- مدينة الجيزة: فيلا البشاري

وهي كمان على طريق المريوطية، وبتتميز بإن فيها مكان خارجي بيسع عدد كبير من الأشخاص للاحتفال بيومك المميز. تأجير الفيلا بيكلف 15000 جنيه، لمعلومات أكتر كلم: 01002242222.

22- مدينة الجيزة: “Cataract Pyramids Resort”

منتجع كاتاراكت بيراميدز في منطقة الحرانية بيقدر يستضيف أفراح أو مناسبات صغيرة وسعر الفرد بيكون 155 جنيه. للحجز والمعلومات كلم: 0237718060.

23- مدينة الجيزة: “Pyramids Park Resort”

على طريق مصر إسكندرية الصحراوي بيقع منتجع بيراميدز بارك اللي بيتميز بمساحة خارجية جميلة لعمل المناسبات وهو مكان مثالي للأفراح تحديدًا. سعر الفرد 200 جنيه، وللحجز اتصل على: 238388300.

24- مدينة الجيزة: “Seasons Country Club”

لو بتدور على مكان يكفي عدد كبير من الضيوف، نادي سيزونز هو واحد من أفضل الحلول اللي قدامك. بجنينة كبيرة وأكل شهي جدًا، الأسعار بتتراوح من 250 ل330 جنيه للفرد. لمعلومات أكتر كلم: 0238387389.

25- مدينة الجيزة: “Royal Club Mohamed Ali”

نادي محمد علي بيقع في امتداد شارع البحر الأعظم وبيطل على النيل بحديقة مشهورة للغاية للاحتفالات. اللي بيخلي المكان مميز أكتر هو دخول العروسين من على مركب بتوصلهم المكان من ناحية النيل. المساحة بيتم تأجيرها ب12000 جنيه وبتحتاج إضاءة ومولد كهرباء بالإضافة لباقي متطلبات وتجهيزات الفرح. لمزيد من المعلومات كلم: 01222113681.

26- مدينة الجيزة: “Villa Andrews”

بعد امتداد شارع البحر الأعظم، فيلا أندروز بتقع على بُعد دقائق من نادي محمد علي. بطلّة جميلة على النيل وحديقة خضراء واسعة، المكان هناك بيتم تأجيره ب15000 جنيه لكنه مش بيوفر أي إضافات أخرى وعليك إنك تجهز كل التحضيرات اللي بتتضمن برده مولد طاقة وأنوار. لمعلومات أكتر كلم: 01223512707.

27- مدينة الجيزة: “Royal Lily”

ودا مكان بيقع برده على امتداد شارع البحر الأعظم. المكان هناك بيقدم إطلالة على النيل بحديقة خضراء بديعة ومناسبة جدًا للصور، دا بالإضافة لممر ومساحة في الأعلى بتخلي المنظر خلاب أكتر. العروسين بيدخلوا من على يخت فخم ومنه بتكون أول رقصة ليهم. الأسعار بتكون من 220 لحد 280، وللحجز كلم: 19412.

28- المنيل: “Nile River Garden”

واقعة في منطقة منيل شيحة مباشرة على النيل، الحديقة في منتهى الجمال بتناسب أي نوع من أنواع الاحتفالات. لمعلومات أكتر، كلم: 01001052566.

آخر كلمة: أخيرًا هتقدر تتخلص من فكرة الأفراح التقليدية وتعمل فرح اقتصادي في أماكن أحلى بكتير!

تعليقات
Loading...
Tweet
Share
Share
Pin