من أحمد السقا لطارق لطفي، تعالوا نتعرف على أقوى أدوار الممثلين في موسم رمضان 2021

يمكن موسم السنادي في رمضان هو واحد من أقوى المواسم في الـ 20 سنة اللي فاتت، وده بسبب تجمع عدد من الفنانين الكُبار، اللي كتير منهم غاب عن شاشة التلفزيون لسنين، ورجعوا كلهم عشان يتألقوا في أعمال جادة وهادفة. ويمكن اللي لفت النظر رمضان ده أدوار الممثلين الذكور، ونجاحهم في تقديم شخصيات مختلفة عن القوالب اللي اتميزوا بيها قبل كدا. تعالوا نشوف مين قدم أقوى أدور الممثلين في موسم رمضان 2021.

أحمد السقا

الفنان أحمد السقا رجع في رمضان 2021 بدور مختلف تمامًا عن أي حاجة قدمها على الشاشة قبل كدا؛ شخصية “عساف الغريب” في مسلسل “نسل الأغراب”، راجل عنيف مصاب بجنون الارتياب تعبيراته وكلامه قليلين لكن أفعاله بيتعملها ألف حساب. ومن زمن وهو في صراع مع ابن عمه “غفران الغريب” اللي بيقوم بدوره أمير كرارة، وفي نص صراع الدم والعنف ده، بنكتشف إن الشخصيتين بيحبوا بنت عمهم الثالث “جليلة” اللي بتقدمها على الشاشة الجميلة “مي عمر”، وبتشتد الأحداث وبنشوف جزء مظلم من السقا ماشوفناش زيه في أي من أعماله قبل كدا.

أمير كرارة

في “نسل الأغراب”، أمير كرارة يرجع بدور قوي يدل على مدى موهبته كممثل وفنان وقدرته على تقديم أدوار متعددة؛ شخصية “غفران الغريب”، متأثرة بتراث الصعيد وأهل الغجر، لكون أمه غجرية ووالده صعيدي؛ شخص فاحش الثراء ومحب للثروة، وده بيظهر في القصر اللي بيملكه وأسطول العربيات والأراضي الشاسعة، وعلى الرغم من كل ده فهو تعيس بسبب الحرب الدايمة مع ابن عمه “عساف الغريب” وحبه لـ”جليلة”، اللي خطفها عساف هي وأولادها.

كريم عبد العزيز

في مسلسل “الاختيار 2″، بيقدم النجم المصري كريم عبد العزيز شخصية ضابط الأمن الوطني “زكريا يونس” اللي قدر يحبط كتير من مخططات الجماعات الإرهابية المختلفة. شخصية “مؤمن زكريا” هي شخصية حقيقية لكن تم تغيير الاسم وده يرجع لأسباب أمنية خصوصًا في الوقت اللي البلد لسه في حرب على الإرهاب. الشخصية اللي كريم عبد العزيز بيقدمها جادة ومختلفة عن شخصية الظابط الكوميدية اللي كان بيطلع بيها في أدواره القديمة.

أحمد مكي

في أول خروج ليه من عباءة الكوميديا، أحمد مكي بيبهرنا بدور أكشن/ دراما مختلف عن أي حاجة قدمها قبل كدا. الرائد / “يوسف الرفاعي” اللي بيخدم في شمال سيناء وفي كل يوم بيواجه خطر الموت مع زمايله. شخصية مكي في “الاختيار 2” شخصية متدينة ووطنية بإخلاص، بيقدمها بشكل جاد مخلوط بخفة الدم من الحين للآخر. وكتير من النقاد بيعتبروا دا دور عمره.

محمد فراج

“الشيخ مؤنس”، الشخصية اللي بيقوم بدورها الفنان محمد فراج في مسلسل “لعبة نيوتن”، محامي دولي مقيم في أمريكا بيقابل “هنا” اللي بتقدمها الفنانة منى ذكي، وبتتقاطع طرقهم بسبب المشكلة اللي كانت بتمر بيها “هنا” هناك، وبنشوف إزاي “الشيخ مؤنس” بيتلاعب بمشاعر “هنا” وبيخطفها من جوزها. وفي الحلقات الأخيرة، بنشوف سقوط القناع اللي كان لابسه “الشيخ مؤنس” في دور مختلف وجديد بيتألق فيه محمد فراج.

محمد رمضان

محمد رمضان رجع للشاشات بعد النجاح الباهر اللي حققه مسلسل “البرنس” في 2020، بـ “موسى” اللي فيه بيحكي صراع أهل الصعيد في مواجهة الاحتلال الإنجليزي. “موسى” عاش في محافظة سوهاج في جنوب مصر في اربعينيات القرن اللي فات، ومن سن صغير تحمل مسؤولية أشقائه ووالده، ومع توالي أحداث المسلسل بنشوف إزاي دوره بيكبر وإزاي بيكون مؤثر في مواجهة الإنجليز.

محمد ممدوح

في “لعبة نيوتن”، بيقدم محمد ممدوح دور “حازم” الزوج الشرقي، اللي فجأة وبسبب تداعيات أحداث كتير بيلاقي نفسه في وسط عدد من المواقف الصعبة، وبسبب تسرعه بيتحول الطين لبلى، وبيفقد حب حياته “هنا”، وفي خلال المسلسل بنشوف إزاي محمد ممدوح بيقدم الدور بطريقة

طارق لطفي

طارق لطفي أبهر الكل في دور “الشيخ رمزي” في مسلسل “القاهرة كابول”، واللي قبل تصويره قضى الفنان وقت كبير بيدرس الحالة النفسي وسلوكيات واجتماعيات أعضاء الجماعات المتطرفة عشان يقدر يقدم الدور بأفضل شكل ممكن. وبالفعل نجح البطل في تقديم الدور ووصل عالم ملئ بالعنف والدم للمشاهد الغير مطلع على الجماعات الإرهابية.

عجبتكم التجميعة دي؟ تفتكروا مين تاني قدم أقوى أدوار من الممثلين في موسم رمضان السنة دي؟ عرفونا في الكومنتس.

آخر كلمة: متفوتوش قراءة: على نهج لعبة نيوتن وجراند أوتيل، ليه مفيش أعمال فنية بتروج للسياحة في مصر بشكل كافي؟

تعليقات
Loading...
Tweet
Share
Share
Pin